Çmimet e naftës ranë ndjeshëm këtë të martë, duke prekur nivelin më të ulët të tre javëve, pas rritjes së shpresave për një marrëveshje mes Shteteve të Bashkuara dhe Iranit për rihapjen e Ngushticës së Hormuzit.
Sekretari amerikan i Shtetit, Marco Rubio, deklaroi se bisedimet me Iranin dhe Omanin kanë shënuar përparim, duke hapur mundësinë për rikthimin e transportit detar përmes kësaj rruge strategjike.
“Është bërë përparim në këto bisedime, por ende nuk është arritur një marrëveshje përfundimtare. Shpresojmë që kjo të ndodhë shumë shpejt”, u tha Rubio gazetarëve.
Ndërkohë, Sekretari amerikan i Thesarit, Scott Bessent, deklaroi se një marrëveshje për rihapjen e Ngushticës së Hormuzit mund të arrihet që të martën ose të mërkurën.
Pas këtyre deklaratave, nafta Brent ra me rreth 5%, duke zbritur nën 80 dollarë për fuçi. Edhe nafta amerikane West Texas Intermediate (WTI) pësoi rënie me më shumë se 5%, duke u tregtuar rreth 76 dollarë për fuçi.
Të dyja kontratat prekën nivelin më të ulët që prej 13 korrikut.
Megjithatë, tregu vijon të mbetet i paqëndrueshëm, pasi dështimet e mëparshme të negociatave mes SHBA-së dhe Iranit kanë mbajtur të larta pasiguritë për furnizimin global me naftë.
Një marrëveshje që do të mundësonte rihapjen e Ngushticës së Hormuzit pritet të lehtësonte presionin mbi furnizimet dhe të ndikonte në uljen e çmimeve të naftës në tregjet ndërkombëtare./Versus.al
