Një pjesë e raketës Falcon 9 të kompanisë SpaceX pritet të përplaset me sipërfaqen e Hënës të mërkurën, më 5 gusht, në një ngjarje të rrallë që ka tërhequr vëmendjen e astronomëve.
Sipas Qendrës së NASA-s për Studime të Objekteve Pranë Tokës (CNEOS), faza e sipërme e raketës do të godasë Hënën me një shpejtësi prej rreth 2.43 kilometrash në sekondë, ose rreth 5,400 milje në orë.
Objekti është pjesë e një rakete të lëshuar në janar 2025. Astronomë të pavarur, duke analizuar të dhënat publike, kanë përcaktuar se faza e sipërme e saj ndodhet në një trajektore të pakontrolluar drejt Hënës.
NASA ka sqaruar se përplasja nuk paraqet asnjë rrezik për Tokën. Agjencia hapësinore amerikane do të vijojë monitorimin e objektit dhe pritet të studiojë më pas zonën e impaktit për qëllime shkencore.
Falcon 9 u përdor në një mision amerikano-japonez për transportimin e dy anijeve hënore dhe pajisjeve kërkimore drejt Hënës. Ndërsa disa pjesë të raketës janë projektuar për t'u rikthyer në Tokë dhe për t'u ripërdorur, fazat e tjera mund të mbeten në hapësirë dhe të përfundojnë në përplasje me trupa të tjerë qiellorë.
Përplasja parashikohet të ndodhë rreth orës 02:35 sipas kohës lindore të SHBA-së, ose 06:35 GMT. Impakti pritet të ngrejë një re të konsiderueshme pluhuri hënor, e cila mund të arrijë në lartësi prej dhjetëra kilometrash mbi sipërfaqe.
Astronomi i Universitetit të Kembrixhit, Matt Bothwell, ka theksuar se mungesa e atmosferës dhe graviteti më i dobët i Hënës mund ta bëjnë përplasjen veçanërisht spektakolare.
Shkencëtarët vlerësojnë se mbeturinat e krijuara nga impakti mund të arrijnë në rreth një milion kilogramë, ndërsa një pjesë e tyre mund të shpërndahet në hapësirë./Versus.al
