Ish-deputeti i PD, Xhemal Gjunkshi i cili nuk arriti të hynte në Kuvend, por ishte më i votuari mes demokratëve në Dibër, ka reaguar së fundmi për takimin e zhvilluar në kafe që ka ngjallur tepër reagime brenda partisë.
Nëpërmjet një shkrimi në rrjete sociale ai sqaron se janë diskutuar çështje që lidhen me situatën politike në vend dhe se pjesëmarrja e tij në këtë takim të iniciuar nga Ervin Salianji e Ilir Alimehmeti, nuk ka të bëjë me asnjë lloj iniciative për krijimin e ndonjë partie të re.
"Unë, siç kam bërë gjithmonë ndër vite, jam takuar me shokë dhe bashkëpunëtorë të Partisë Demokratike për të diskutuar për çështje që lidhen me situatën politike në vend. Unë kam qenë, jam dhe do të mbetem institucional, i përkushtuar ndaj Partisë Demokratike, ndaj parimeve të saj, në shërbim të elektoratit tim që më votuan dhe më besuan. Nuk kam qenë dhe nuk jam pjesë e asnjë nisme që synon të krijojë alternativa jashtë kësaj partie", thotë Xhemal Gjunkshi.
Gjunkshi nuk u fut dot në Kuvend për shkak se ishte në listën e hapur të PD dhe nga lista e mbyllur u garantua hyrja e Xhelal Mziut dhe Denisa Vatës.
Në takimin e shumëpërfolur kanë qenë të pranishëm kandidatët e PD më të votuar në të gjitha qarqet e vendit. Vetë Berisha tha se takimet në kafe nuk meritojnë koment, por nënvizoi se ky takim është krejt i zakonshëm dhe nuk përbënte ndonjë risi. Versus.al
