Pasi socialistët miratuan me 74 vota në Kuvend kredinë prej 302 milionë dollarësh me SHBA-të për blerjen e pajisjeve ushtarake, edhe pala amerikane ka njoftuar ratifikimin e marrëveshjes.
Në njoftim thuhet se kjo marrëveshje do të mbështesë përpjekjet e Shqipërisë për të përmbushur angazhimin e vendeve të NATO-s për rritjen e shpenzimeve të mbrojtjes në nivelin 5% të Prodhimit të Brendshëm Bruto deri në vitin 2035.
Kredia FMF do të përdoret për modernizimin e Forcave të Armatosura të Shqipërisë, përmes blerjes së kapaciteteve kryesore me origjinë nga Shtetet e Bashkuara, si dhe për forcimin e aftësive mbrojtëse të Evropës.
Ndërkohë në Kuvend, kjo kredi shkaktoi shumë debate pasi opozita e konsideroi të papranueshëm faktin që shpenzime të tilla të bëhen për të marrë kredi ndërkohë që sipas tyre qeveria ka shpërdoruar fondet publike. Partia Demokratike e ka dërguar në Gjykatën Kushtetuese marrëveshjen duke pretenduar se për miratimin e saj ishte shkelur 7 herë Kushtetuta. Versus.al
