Situata vijon të jetë alarmante në Krujë, ku tre vatra zjarri mbeten aktive në lagjet Abaze dhe Boje, si dhe në vendgrumbullimin e mbeturinave në Kameras.
Në lagjen Abaze, zjarri vijon të jetë aktiv në zonën e Kroit të Madh, ndërsa era e fortë po favorizon përhapjen e flakëve në drejtim të banesave.
Përballë rrezikut, banorët kanë nisur të marrin masa, duke larguar fëmijët, të moshuarit dhe sendet me vlerë nga zonat e prekura. Disa prej tyre kanë nisur edhe prerjen e pemëve, me qëllim krijimin e një hapësire që të pengojë avancimin e flakëve drejt banesave.
Helikopterët që ishin angazhuar në operacion janë larguar nga zona, ndërsa ndërhyrja po vijon nga toka me forca dhe mjete zjarrfikëse.
Situata mbetet e vështirë edhe në lagjen Boje, ku një tjetër vatër vijon të jetë aktive. Ndërkohë, është riaktivizuar zjarri edhe në vendgrumbullimin e mbetjeve në Kameras.
Në të trija vatrat po punohet nga toka për izolimin dhe shuarjen e flakëve, ndërsa era me intensitet të lartë po e vështirëson ndjeshëm ndërhyrjen dhe po rrit rrezikun e përhapjes së zjarrit.
