Deputetja e Partisë Demokratike, Elda Hoti është paraqitur mëngjesin e sotëm në Prokurorinë e Posaçme (SPAK) për të dhënë shpjegime mbi kaosin e krijuar gjatë seancës plenare të 17 tetorit në Kuvendin e Shqipërisë.
Mes pak deputetëve që ndodheshin në sallë, Elda Hoti u përpoq të pengonte diskutimet e rendit të ditës dhe në një moment hodhi në drejtim të deputetëve socialistë një material të lëngshëm që e nxorri nga çanta.
Në dalje nga SPAK, Hoti e cilësoi si “qesharake” vëmendjen që i kushtohet kaosit të krijuar në Kuvend nga PD kur vendi ka çështje shumë më të rëndësishme për t’u shqetësuar.
“Është e turpshme dhe qesharake që sot të merren me atë që ndodhi në Kuvend. Sot shqetësim duhet ë jetë masakra që ndodhi dje në Shkodër, sesi shteti i së drejtës i është dorëzuar krimit dhe bandave. Sot drejtësia duhet të ketë guximin të godasë bandat kriminale me të cilat Rama ka deformuar vullnetin e shqiptarëve”- u shpreh Hoti ndër të tjera.
Fillimisht kryeparlamentarja Elisa Spiropali e akuzoi deputeten se kishte kryer vepër penale dyke hyrë me benzinë në Kuvend dhe më pas duke i lyer me deputetët me të. Kjo gjë u hodh poshtë nga Hoti e cila tha se bëhej fjalë për aromatizues dhe jo benzinë. ‘Ekspertizën’ e shishes u përpoqën ta bënin edhe vetë ministrat, të cilët e morën me radhë duke e nuhatur, derisa ministri i Brendshëm Ervin Hoxha e sekuestroi për t’ja dorëzuar policisë në cilësinë e provës materiale.
Policia referoi materialet në prokurorinë e posaçme ndaj Elda Hotit me akuzën “shkelja e rregullave mbi lëndët helmuese”. Versus.al
