Një sulm i fuqishëm ajror nga Rusi ka goditur gjatë natës Ukrainë, duke lënë të paktën 7 persona të vrarë dhe mbi 30 të plagosur, ndërsa situata ka vënë në alarm edhe Rumani, ku janë ngritur në fluturim avionë luftarakë britanikë.
Sipas forcave ajrore ukrainase, Rusia lëshoi gjithsej 619 dronë dhe 47 raketa në një nga sulmet më të mëdha të muajve të fundit. Mbrojtja ajrore e Ukrainës arriti të rrëzojë 580 dronë dhe 30 raketa.
Bilanci i viktimave është i rëndë: 5 persona humbën jetën në qytetin Dnipro, ndërsa 2 të tjerë u vranë në rajonin e Chernihiv, sipas shërbimeve të emergjencës.
Ndërkohë, tensioni u përhap edhe përtej kufirit. Autoritetet rumune raportuan se avionë Eurofighter Typhoon të Forcave Ajrore Mbretërore britanike u ngritën rreth orës 02:00 nga baza ajrore në Fetesti, në kuadër të misionit të përforcuar të patrullimit ajror të NATO-s.
Sipas Ministrisë rumune të Mbrojtjes, avionët vendosën kontakt radarik me objektiva pranë kufirit lindor të Rumanisë me Ukrainën, vetëm 1.5 kilometra nga qyteti ukrainas Reni.
Rreth orës 02:30, një objekt i paidentifikuar u raportua se kishte rënë në zonën Bariera Traian, pranë qytetit Galati. Më vonë, në vendngjarje u gjetën fragmente droni, duke rritur shqetësimet për shkelje të hapësirës ajrore rumune.
Ministria e Mbrojtjes e Rumanisë bëri të ditur se pilotët britanikë ishin të autorizuar të angazhoheshin ndaj dronëve në rast nevoje, ndërsa situata mbetet e tensionuar në zonën kufitare.
Ky zhvillim vjen në një kohë kur sulmet ruse ndaj infrastrukturës dhe qyteteve ukrainase vijojnë të intensifikohen, duke rritur rrezikun e përshkallëzimit të konfliktit edhe në vendet anëtare të NATO-s.
