Vladimir Putin nuk po udhëton për në Alaska për t'i dhënë fund luftës në Ukrainë.
Siç vlerëson CNN , presidenti rus e sheh takimin me Donald Trump si një mundësi të rrallë për të dalë nga izolimi ndërkombëtar, për të përmirësuar prestigjin e tij dhe për të ripërcaktuar marrëdhëniet SHBA-Rusi në dobi të Moskës - duke e lënë Ukrainën në sfond.
Takimi, siç u njoftua më herët sot, do të zhvillohet në mbrëmje të premten dhe sipas këshilltarit të Putinit, Yuri Ushakov, udhëheqësit e SHBA-së dhe Rusisë fillimisht do të takohen vetëm në prani të përkthyesve.
Për zyrtarët rusë dhe komentatorët pro-Kremlinit, vetë fakti i një takimi të tillë kokë më kokë është tashmë një fitore e madhe diplomatike për Putinin.
"Askush nuk po flet më për izolimin ndërkombëtar të Rusisë apo për humbjen tonë strategjike", shkroi blogeri i shquar ushtarak Alexander Kots në kanalin e tij të njohur në mediat sociale.
Për nacionalistët rusë, fakti që presidenti rus do të jetë në tokën amerikane, dhe në Alaska në veçanti, shihet si një konfirmim simbolik i retorikës se territori, dikur pjesë e Perandorisë Ruse dhe i shitur Shteteve të Bashkuara në vitin 1867 për vetëm 7.2 milionë dollarë, "i përket me të drejtë Rusisë".
Nuk është rastësi që videot e Trump duke u ngatërruar në një konferencë për shtyp në Shtëpinë e Bardhë dhe duke thënë se po shkonte "në Rusi" për të takuar Putinin kanë qarkulluar në mediat sociale ruse, me përdoruesit që komentojnë se ai "më në fund pranoi se është e jona".
Megjithatë, në pjesën tjetër të botës, vëmendja është diku tjetër: në luftën në Ukrainë dhe nëse Moska është e gatshme të bëjë lëshime të konsiderueshme për ta përfunduar atë.
Shtëpia e Bardhë argumenton se Trump dëshiron të përqendrohet vetëm në arritjen e paqes, duke i lënë çështjet e tjera me interes për Rusinë të tilla si lehtësimi i sanksioneve të SHBA-së ose marrëveshjet e mundshme mbi Arktikun dhe teknologjinë për më vonë. Të mërkurën, pas një telefonate me Presidentin ukrainas Volodymyr Zelensky dhe udhëheqësit evropianë, Trump foli për "pasoja shumë serioze" për Putinin nëse ai nuk i jep fund luftës.
Megjithatë, pala ruse duket e palëkundur. Sipas raportimeve, edhe para se të finalizohej takimi në Alaska, Moska i përcolli nëpërmjet të dërguarit presidencial të SHBA-së, Steve Witkoff, një propozim paqeje që parashikonte lëshimin e territorit ukrainas në Donbas në këmbim të një armëpushimi - diçka që Kievi e hodhi poshtë kategorikisht.
"Nuk do ta dorëzoj vendin tim sepse nuk kam të drejtë ta bëj këtë", tha Zelensky.
Rusia vazhdon të përmendë "shkaqet rrënjësore" të konfliktit, të cilat përfshijnë, sipas narrativës së Kremlinit, zgjerimin e NATO-s dhe vetë ekzistencën e një Ukraine të pavarur.
Trump, megjithatë, duket më pozitiv për një marrëveshje "tokë për paqe", e cila do t'i jepte Putinit mundësinë të paraqesë ukrainasit dhe evropianët - dhe jo Rusinë - si një pengesë për paqen.
Një zhvillim i tillë mund të minojë mbështetjen e Trump për Ukrainën, me pasoja të mundshme për ndihmën ushtarake amerikane dhe ndarjen e inteligjencës.
Shtëpia e Bardhë, megjithatë, i ka minimizuar pritjet, duke e përshkruar samitin si një "ushtrim dëgjimi".
Për Kremlinin, i cili kërkoi takimin - me sa duket për të shmangur tarifat e SHBA-së dhe sanksionet dytësore që Trump kishte kërcënuar kjo mund të jetë tashmë një fitore.
Përtej Ukrainës, Putin e sheh Trumpin si një mundësi unike për të “rivendosur” marrëdhëniet SHBA-Rusi, duke i shkëputur ato nga lufta dhe duke i përçarë potencialisht aleatët perëndimorë.
Për muaj të tërë, Kremlini ka folur për perspektivat e bashkëpunimit ekonomik, teknologjik dhe hapësinor me Uashingtonin, si dhe për projektet e energjisë dhe infrastrukturës në Arktik.
Prania në mision e Kirill Dmitriev, negociatorit kryesor ekonomik të Rusisë me administratën Trump, tregon se “paketa” e Moskës për Alaskën përfshin shumë më tepër sesa vetëm Ukrainën.
Nëse Putini në fund i arrin qëllimet e tij, "çështja ukrainase" mund të përfundojë duke qenë vetëm një nga shumë çështjet në axhendën e dy udhëheqësve dhe jo domosdoshmërisht më e rëndësishmja.
Putin para takimit me Trump: Amerikanët po bëjnë përpjekje të sinqerta për t'i dhënë fund luftës
Megjithatë, Presidenti rus Vladimir Putin zhvilloi një takim me anëtarë të udhëheqjes së lartë të Rusisë, si dhe përfaqësues të qeverisë dhe administratës presidenciale, si pjesë e përgatitjeve për takimin e ardhshëm me një delegacion amerikan në Alaska më 15 gusht, njoftoi zëdhënësi i Kremlinit Dmitry Peskov.
Në fjalimin e tij, Putin pranoi se qeveria amerikane po bën përpjekje mjaft aktive dhe të sinqerta për t'i dhënë fund konfliktit në Ukrainë.
"Ju kërkova të mblidheni sot për të na informuar rreth fazës në të cilën ndodhemi për takimin me administratën aktuale amerikane, e cila, siç e dinë të gjithë, po bën përpjekje mjaft aktive dhe të sinqerta për të ndaluar armiqësitë, për t'i dhënë fund krizës dhe për të arritur marrëveshje që janë në interes të të gjitha palëve të përfshira në këtë konflikt, me qëllim krijimin e kushteve afatgjata të paqes midis vendeve tona, në Evropë dhe në botë në tërësi. Sidomos nëse arrijmë marrëveshje në fushën e kontrollit strategjik të armëve ofensive në fazat e ardhshme", tha presidenti rus./Përshtati në shqip Versus.al
