Një valë moti i keq goditi Toskanën, ku shiu goditi veçanërisht zonat e Pizës dhe Livornos. Ndërkohë vijojnë kërkimet për gjetjen e një foshnje 5-muajshe dhe gjyshes së tij, të zhdukur për shkak të përmbytjes së shkaktuar nga përroi i Sterzës në Montecatini (Pisa), i cili pushtoi shtëpinë e tyre deri në 2.5 metra lartësi. Dy viktimat e dyshuara nip e gjyshe ishin turistë gjermanë. Pjesa tjetër e familjes babai, nëna dhe gjyshi - shpëtuan nga rryma e ujit duke u kapur pas shtyllave të një verande. Zhytësit po vijojnë kërkimet për gjetjen e dy trupave. Dëme të rënda kanë ndodhur edhe në Castagneto (Livorno), i goditur nga shiu i dendur gjatë natës. Moti i keq shkaktoi dëme të rënda edhe në rajonin e Venetos, ku përmbytja e disa lumenjve në zonën e Padovës bëri që 11 persona të evakuohen.
Tragjedia në familjen gjermane
Që nga mbrëmja e djeshme, pas përmbytjes së përroit të Sterzës, kanë humbur gjurmët e dy personave, foshnjës pesë muajshe Noah dhe gjyshes së tij, Sabine Wagner, dy turiste nga Gjermania, të cilët ndodheshin me pjesën tjetër të familjes në një shtëpi pushimi në zonën e Gabella për të kaluar pushimet. Gjyshja dhe nipi u rrëmbyen nga rryma e shiut dhe e ujrave që erdhën nga lumenjtë dhe kanalet e zonës. Kur uji filloi të rrethonte shtëpinë me qira në fermën afër Sterzës, ishte errësirë jashtë. Familja gjermane u kërkoi ndihmë zjarrfikësve, por vështirësitë gjuhësore dhe komunikimet e ndërprera e bënë gjithçka shumë më të vështirë. Pak minuta më vonë gjyshja dhe nipi morën para nga rryma shumë e fortë e valës së përmbytjes dhe u zhduken.
Autoritetet italiane saktësuan se brenda 6 orëve ka rënë rreth 226 milimitra shi, ose e thënë ndryshe një sasi më e madhe se sa shirat në muajin më të lagësht. Kjo është sasi më e madhe e shiut e rënë në një ditë në 50 vitet e fundit në komunat e Montecatinit dhe Monteverdes.
