Ukraina ka propozuar një raund të ri bisedimesh paqeje me Rusinë. Kështu është shprehur së fundmi presidenti i vendit Volodymyr Zelensky i cili tha se ka si synim rifillimin e negociatave që u ndalën muajin e kaluar.
Zyrtari i lartë i sigurisë Rustem Umerov është ofruar të takohet me palën ruse javën e ardhshme, tha Zelensky në fjalimin e tij në mbrëmje, duke shtuar se gjithçka duhej bërë për të arritur një armëpushim.
Zelenksy përsëriti gjithashtu gatishmërinë e tij për t'u takuar ballë për ballë me Vladimir Putinin e Rusisë. "Një takim në nivel udhëheqësish është i nevojshëm për të siguruar vërtet paqen," tha ai.
Propozimi erdhi disa orë pasi Ukraina u godit me një tjetër bombardim ajror të përhapur nga Rusia, i cili vrau tre persona. Dhjetë rajone të Ukrainës, përfshirë disa qytete, u goditën natën midis të premtes dhe të shtunës, tha Zelensky më herët të shtunën.
Ushtria e Ukrainës tha se më shumë se 340 dronë shpërthyes dhe të rremë dhe 35 raketa kruiz dhe balistike ishin përdorur, por shumë prej tyre u rrëzuan.
Më herët këtë javë, Presidenti Donald Trump tha se SHBA-të do të dërgonin "armë të nivelit të lartë" në Ukrainë nëpërmjet vendeve të NATO-s, ndërsa kërcënoi gjithashtu Rusinë me tarifa të ashpra nëse një marrëveshje për t'i dhënë fund luftës nuk arrihet brenda 50 ditëve.
Trump paralajmëroi gjithashtu se SHBA-të do të vendosnin tarifa dytësore 100% që synonin partnerët e mbetur tregtarë të Rusisë nëse një marrëveshje paqeje me Ukrainën nuk arrihej brenda afatit të tij.
Dy raunde bisedimesh në Stamboll midis Moskës dhe Kievit deri më tani nuk kanë rezultuar në ndonjë përparim drejt një armëpushimi, por u ra dakord për shkëmbime të të burgosurve në shkallë të gjerë dhe marrëveshje për kthimin e trupave të ushtarëve të vrarë.
Pas raundit të fundit, i cili përfundoi në fillim të qershorit, negociatorët ukrainas thanë se Rusia kishte hedhur poshtë përsëri një "armëpushim të pakushtëzuar" - një kërkesë kyçe nga Kievi dhe aleatët e tij në Evropë dhe SHBA. Rusia gjithashtu përshkroi një listë kërkesash, duke përfshirë thirrjet që Ukraina të lëshojë më shumë territor dhe të refuzojë të gjitha format e mbështetjes ushtarake perëndimore.
Në atë kohë, Zelensky akuzoi Moskën se "po bën gjithçka që mundet për të siguruar që takimi i ardhshëm i mundshëm të jetë i pafrytshëm". Presidenti rus Vladimir Putin nisi një pushtim në shkallë të plotë të Ukrainës në shkurt të vitit 2022. Rusia aktualisht kontrollon rreth 20% të territorit të Ukrainës, përfshirë gadishullin jugor të Krimesë që Moska e aneksoi në vitin 2014. Versus.al
