Rusia ka njoftuar se do të pezullojë transportin e naftës nga Kazakistani drejt Gjermanisë përmes tubacionit “Druzhba” duke filluar nga muaji i ardhshëm, duke e justifikuar vendimin me arsye “teknike”.
Zëvendëskryeministri rus Alexander Novak deklaroi në Kremlin se nga 1 maji, sasitë e naftës kazake që kalonin më parë përmes këtij tubacioni do të devijohen në rrugë të tjera logjistike ekzistuese, për shkak të kapaciteteve aktuale teknike.
“Gjermanët kanë hequr dorë nga nafta ruse, kështu që po ecin mirë,” tha Novak, duke iu referuar vendimit të BE-së për të reduktuar importet e energjisë nga Rusia.
Nga ana tjetër, Ministria e Ekonomisë në Gjermani dhe autoritetet energjetike të Kazakistanit kanë bërë të ditur se për muajin e ardhshëm nuk ishte planifikuar furnizim me naftë përmes këtij tubacioni.
Tubacioni “Druzhba” kalon përmes territorit rus dhe ndahet në dy degë kryesore: njëra kalon përmes Ukrainës drejt Hungarisë, ndërsa tjetra përmes Bjellorusisë dhe Polonisë drejt Gjermanisë.
Ndërprerja e furnizimit pritet të ndikojë kryesisht në rafinerinë PCK në Schwedt, rreth 100 kilometra në verilindje të Berlinit, e cila furnizon pjesën më të madhe të karburanteve për kryeqytetin gjerman, aeroportin dhe zonat përreth.
Sipas të dhënave të publikuara, rafineria mbulon rreth 90% të nevojave të Berlinit për benzinë, naftë dhe karburant për ngrohje.
Autoritetet gjermane theksuan se lajmi u mësua fillimisht përmes degës gjermane të kompanisë shtetërore ruse Rosneft. Ndërkohë, Ministria e Ekonomisë dhe Energjisë në Gjermani deklaroi se po vlerësohen të gjitha skenarët për të garantuar sigurinë e furnizimit.
Sipas ministrisë, ndalimi i përkohshëm i naftës kazake nuk e rrezikon seriozisht furnizimin me produkte nafte në Gjermani, edhe pse mund të çojë në ulje të kapacitetit të funksionimit të rafinerisë PCK Schwedt.
Vendimi vjen në një moment tensionesh të larta në tregjet globale të energjisë, të ndikuara nga zhvillimet gjeopolitike dhe pasiguritë në furnizimin me naftë dhe gaz në Europë.
