Pas rreth 4 orësh e 30 minutash ka përfunduar takimi i kryeministrit Edi Rama me kryetarët e bashkive, i zhvilluar në Kuç, ku në fokus ishte reforma e re administrativo-territoriale dhe ndryshimet e propozuara në hartën e bashkive.
Në takim morën pjesë kryetarët e bashkive në rang qarku, si dhe drejtuesit e bashkive që parashikohet të shkrihen në kuadër të reformës.
Gjatë mbledhjes janë zhvilluar diskutime për bashkimet e propozuara, ndërsa kryetarët e bashkive që rrezikojnë të mos jenë pjesë e hartës së re kanë paraqitur argumentet e tyre për vijimin e ekzistencës së njësive që drejtojnë.
Sipas burimeve, diskutime ka pasur me të gjithë kryetarët e bashkive të pranishëm, ndërsa në tryezë janë hedhur edhe argumentet e qeverisë në favor të bashkimeve.
Në takim ishin të pranishëm drejtuesit e bashkive Durrës, Shkodër, Kukës, Elbasan, Korçë, Berat, Vlorë, Gjirokastër, Klos, Rrogozhinë, Dimal, Poliçan, Patos, Divjakë, Selenicë, Maliq, Këlcyrë, Cërrik, Belsh dhe Libohovë
Qeveria e ka cilësuar takimin si informues, me qëllim prezantimin e reformës së propozuar nga Partia Socialiste dhe diskutimin e hapave të mëtejshëm.
Sipas qeverisë, reforma synon krijimin e njësive vendore me më shumë kapacitete, shërbime më të mira dhe administrim më efikas. Në fokus është edhe garantimi i vijimit të shërbimeve për qytetarët në zonat që do të përfshihen në bashkime.
Rama dhe përfaqësuesit e qeverisë kanë argumentuar se përvoja e reformës administrativo-territoriale të vitit 2014 ka treguar përfitime nga bashkimet e njësive vendore.
Ndërkohë, reforma pritet të vijojë përmes konsultimeve me bashkitë, komunitetet dhe aktorët e tjerë të përfshirë, përpara përcaktimit përfundimtar të hartës së re territoriale./Versus.al
