Gjirokastër- Ka vijuar faza e tretë e operacionit “Andromeda” në kuadër të të cilit deri më tani janë kryer 17 arrestime nën akuzën e trafikut të drogës.
Gjatë kësaj faze janë ushtruar 12 masa sigurie, 10 prej të cilave “arrest me burg” ndërsa 2 të tjera “arrest shtëpie”. Të arrestuarit akuzohen si pjesëtarë të grupit kriminal të përfshirë në shitjen e drogës në zona të ndryshme të qytetit.
Në pranga kanë rënë:
- H. H., 38 vjeç, D. O., 38 vjeç, K. G., 26 vjeç, B. C., 42 vjeç, R. Gj., 33 vjeç, dhe E. T., 35 vjeç, banues në Gjirokastër, për veprën penale "Prodhimi dhe shitja e narkotikëve, kryer në bashkëpunim.
- I. K., 49 vjeç, E. D., 22 vjeç, E. Ç., 36 vjeç, banues në Gjirokastër, për veprën penale "Prodhimi dhe shitja e narkotikëve", si dhe Th. K., 41 vjeç, banues në Gjirokastër, për veprën penale "Ushtrimi i ndikimit të paligjshëm ndaj personave që ushtrojnë funksione publike".
Sipas hetimeve rezulton se këta persona në bashkëpunim me 5 të tjerë të arrestuar në datat 25 tetor dhe 13 nëntor të vitit të kaluar, janë të përfshirë në shitjen e kokainës dhe kanabisit.
Në këtë grup kriminal rezultonin të përfshirë edhe 2 policë të identifikuar si L.K 32 vjeç dhe O.B 29 vjeçe, ndaj të cilëve është marrë masa e pezullimit nga detyra si efektivë në pikën kufitare të Kakavijës.
Gjatë kontrolleve të ushtruara për të gjetur provat materiale me qëllim të dokumentimin ligjor të veprimtarisë kriminale të këtyre shtetasve, janë gjetur dhe sekuestruar shuma të konsiderueshme vlerash monetare, lëndë narkotike Cannabis dhe Kokainë, municion luftarak, celularë, automjete, dokumente të falsifikuara, mallra kontrabandë etj.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme. Versus.al
