Zbërthimi i aplikacionit “Ghost” solli një furtunë të re për botën e krimit që e përdorte rrjetin për të komunikuar lidhur me veprimtarinë kriminale të trafikut të lëndëve narkotike. Falë një operacioni të zhvilluar në Australi, u arrestuan 51 persona të rrjetit kriminal të trafikut të drogës ndërsa hetimet zbuluan se të përfshirë janë edhe trafikantë shqiptarë të cilët kishin transportuar disa ngarkesa drogë në kontinentin e largët.
Sipas detajeve të tjera të publikuara nga mediat e huaja, mes të arrestuarve është edhe 43 vjeçari italian Giovanni Parlangeli i cili njihet si një prej krerëve ytë mafias “Sacra Corona Unita” të Italisë që renditet mes organizatave të tjera mafioze si Ndragheta, Camorra dhe Cosa Nostra. Së fundmi mafia italiane Sacra Unita ka krijuar lidhje të forta me organizatat kriminale në Shqipëri të përfshira në lëvizjen e dërgesave të drogës.
Parlangeli ishte i shpallur në kërkim që prej vitit të kaluar si një prej krerëve të organizatës mafioze që bashkëpunonte me shqiptarët. Grupi mafioz besohet se po përdor Shqipërinë si një pikë shpërndarjeje për të lëvizur drogën në Evropën Qendrore, si dhe për marrjen e drogës nga Afganistani në vend.
Arrestimi i tij u bë një shtëpi fshati që ndodhet midis Taviano dhe Racale, ku sekuestroi gjithashtu një sasi të madhe municionesh dhe dokumente false.
Pas një hetimi të gjatë ndërkombëtar, rrjeti Ghost u hoq nga qarkullimi gjatë operacioneve në nëntë vende. 51 të dyshuar janë arrestuar në Australi, 11 në Irlandë, një në Kanada dhe së fundmi 43 vjeçari në Itali. Versus.al
