Ushtria e Shteteve të Bashkuara të shtunën kreu sulme ajrore ndaj objektivave të grupit të Shtetit Islamik në Somali. Lajmin e bëri me dije vetë presidenti i SHBA, Donald Trump i cili pati edhe një paralajmërim të fortë për militantët e ISIS.
“Këtë mëngjes urdhërova sulme ajrore të sakta ndaj planifikuesit kryesor te sulmeve të ISIS dhe terroristëve të tjerë që ai rekrutoi dhe udhëhoqi në Somali. Këta vrasës, të cilët i gjetëm të fshehur në shpella, kërcënuan Shtetet e Bashkuara dhe aleatët tanë. Sulmet shkatërruan shpellat ku ata jetojnë dhe vranë shumë terroristë pa dëmtuar asnjë civil. Ushtria jonë e ka vënë në shënjestër. Mesazhi për ISIS-in dhe të gjithë të tjerët që sulmojnë amerikanët është se ‘NE DO T’JU GJEJMË DHE NE DO T’JU VRASIM’ “, shkroi Trump në X.
Sekretari i Mbrojtjes Pete Hegseth tha se sulmet kishin në shënjestër operativët e IS-Somali në malet Golis në rajonin gjysmë-autonom Puntland. "Vlerësimi ynë fillestar është se shumë operativë u vranë në sulmet ajrore dhe asnjë civil nuk u dëmtua," tha Hegseth në një deklaratë.
Komandantët lokalë konfirmuan sulmet.
"Ne nuk e dimë deri tani numrin e viktimave, por besojmë se raketat goditën saktësisht objektivat," tha Mohamed Ali, një komandant ushtarak në zonën Bossaso. "Ne besojmë se ka viktima të liderëve terroristë, duke përfshirë të huajt që forcat Puntland po ndiqnin ditët e fundit," shtoi ai.
Abdirahman Adan, një tjetër anëtar i ushtrisë në një zonë aty pranë, tha se ata dëgjuan pesë shpërthime të forta dhe panë tym mbi zone.
Puntland nuk ka komentuar zyrtarisht për sulmin ajror deri më tani.
Hegseth tha se sulmet degradojnë më tej "aftësinë e ISIS-it për të komplotuar dhe kryer sulme terroriste që kërcënojnë qytetarët amerikanë, partnerët tanë dhe civilët e pafajshëm dhe dërgojnë një sinjal të qartë se Shtetet e Bashkuara janë gjithmonë të gatshme për të gjetur dhe eliminuar terroristët që kërcënojnë Shtetet e Bashkuara dhe aleatët tanë."
Shteti Islamik ka një prani relativisht të vogël në Somali në krahasim me Al-Shabaab të lidhur me Al-Kaedën, por ekspertët kanë paralajmëruar për rritjen e aktivitetit. Versus.al
