Sot, e premte, 7 shkurt 2025, në orën 16:19, një tërmet me magnitudë 4.8 është regjistruar në Detin Tirren, në largësi të ishullit Alicudi, në arkipelagun e Eolieve, provinca e Mesinës.
Lëkundjet janë ndjerë në të gjithë Siçilinë, nga Palermo në Katania dhe Mesina, si dhe në Kalabri, veçanërisht në Rexho Kalabria. Në ishujt Alicudi dhe Filicudi, shumë njerëz dolën në rrugë nga frika.
Pas goditjes kryesore, janë regjistruar disa pasgoditje në të njëjtën zonë, me magnituda që varionin nga 2.5 deri në 2.9. E para, me magnitudë 2.7, ndodhi në orën 16:40 me një thellësi prej 7 km; e dyta, me magnitudë 2.5, në orën 16:42 me një thellësi prej 4 km; dhe e treta, me magnitudë 2.9, në orën 16:48 me një thellësi prej 7 km.
Aktualisht, nuk raportohet për dëme në njerëz apo materiale. Autoritetet lokale po monitorojnë situatën dhe u bëjnë thirrje qytetarëve të qëndrojnë të qetë dhe të ndjekin udhëzimet zyrtare.
???????? [DATI #RIVISTI] #terremoto ML 4.8 ore 16:19 IT del 07-02-2025 a Isole Eolie (Messina) Prof= 17.1 Km #INGV_41383881 https://t.co/0T66ILlUGb
— INGVterremoti (@INGVterremoti) February 7, 2025
Ky aktivitet sizmik është pjesë e një lëvizjeje më të gjerë tektonike në rajon. Kohët e fundit, edhe ishulli grek i Santorinit ka përjetuar një seri tërmetesh, disa prej të cilave me magnitudë deri në 5.2, duke shkaktuar evakuimin e mijëra njerëzve
Siçilia dhe zonat përreth janë rajone me aktivitet të lartë sizmik për shkak të ndërveprimit kompleks midis pllakave tektonike afrikane dhe euroaziatike. /Versus.al/
