Më shumë se 50 njerëz u vranë të shtunën nga sulmet izraelite në Liban, kryesisht në Bejrut, njoftoi ministria e shëndetësisë e vendit, ndërsa ministri i Mbrojtjes i Izraelit, Israel Katz, deklaroi se vendi i tij do të vazhdojë të veprojë "me vendosmëri" kundër Hezbollahut.
Të paktën 15 persona humbën jetën në sulmin izraelit në lagjen Basta të Bejrutit dhe 63 u plagosën.
38 të tjerë u vranë në sulme në verilindje dhe jug të kryeqytetit libanez, njoftoi ministria libaneze e shëndetësisë. Prej tyre, 16, përfshirë katër fëmijë, u vranë në rajonin Baalbek, i cili konsiderohet një bastion i Hezbollahut. 14 të tjerë u vranë në jug, pesë prej tyre në Tiro.
Në Bejrut, një ndërtesë tetë-katëshe u godit nga katër raketa të dizajnuara për të shkatërruar objektiva nëntokësore, tha një burim libanez i sigurisë. Izraeli ka përdorur bomba të tilla depërtuese për të vrarë figura të larta të Hezbollahut, duke përfshirë liderin e grupit Hassan Nasrallah, shtatorin e kaluar.
Amin Siri, një anëtar i parlamentit që përfaqëson Hezbollahun, tha se nuk kishte anëtarë të lartë të grupit në ndërtesën që u godit. Ushtria izraelite nuk ka bërë asnjë koment.
