Presidenti i SHBA Donald Trump dhe kryeministri kanadez Justin Trudeau folën me telefon të mërkurën pasdite, i thanë CNN dy zyrtarë të Shtëpisë së Bardhë. Biseda siç lehtësisht mund të mendohet ishte në kuadër të "luftës" tregtare që ka shpërthyer mes SHBA-së dhe Kanadasë orët e fundit.
"Justin Trudeau është përgjegjës për problemet që SHBA ka me Kanadanë, tha Donald Trump pasi dy liderët folën me telefon.
Në një postim në “Truth Social”, presidenti amerikan, pasi përmendi se Trudeau e kishte telefonuar për tarifat, pretendon se i kishte thënë se “shumë njerëz kanë vdekur nga fentanili që ka dalë në kufirin Kanada-Meksikë dhe asgjë nuk më ka bindur se kjo ka ndaluar”.
Ai tha se situata është përmirësuar, por unë i thashë: “Nuk mjafton”. Telefonata përfundoi në një mënyrë “disi” miqësore! Ai nuk mund të më thoshte se kur do të mbaheshin zgjedhjet në Kanada, gjë që më bëri kurioz, si, çfarë po ndodh këtu? Atëherë e kuptova se ai po përpiqet ta përdorë këtë çështje për të qëndruar në pushtet. Fat të mbarë Justin! Për këdo të interesuar, i thashë gjithashtu Justin Trudeau se ai vetë shkaktoi kryesisht problemet që kemi me ta për shkak të politikës së tij të dobët kufitare, e cila lejoi sasi masive të fentanilit dhe të huajve të paligjshëm të hynin në Shtetet e Bashkuara. Këto politika janë përgjegjëse për vdekjen e shumë njerëzve!”, tha Donald Trump.
Kujtohet se dje, me vendim të Trump, hynë në fuqi tarifat amerikane prej 25 % për produktet e importuara nga Meksika dhe Kanadaja.
Tarifat u vendosën pasi presidenti amerikan pretendoi se partnerët kryesorë tregtarë të SHBA-së nuk po bënin mjaftueshëm për të ndaluar importimin e fentanilit dhe narkotikëve të tjerë në vendin e tij.
Kanadaja njoftoi menjëherë se do të vendoste tarifa përkatëse, që arrijnë në dhjetëra miliarda dollarë për produktet e importuara amerikane, duke rezultuar në kërcënimin e Trump për përshkallëzimin e tarifave.
