Një postim në rrjetet sociale nga djali i shefit famëkeq të Cosa Nostra ka shkaktuar zemërim në qytetin sicilian të Corleone, pasi u pa si minim i përpjekjeve të komunitetit për të hequr qafe të kaluarën e tij të errët me krimin e organizuar.
Më 15 gusht, ditën kur italianët festojnë Ferragosto, "Salvuccio" Giuseppe Salvatore Riina , djali i Salvatore "Toto" Riina , lideri i mafies siciliane nga viti 1974 deri në arrestimin e tij në 1993, uroi me një postim në rrjetet sociale "Gëzuar Festat nga 24 Via Scorsone, Corleone”.
Sipas Guardian, kjo ishte prej vitesh adresa e shtëpisë së familjes Riina në qytetin e vogël, por në vitin 2018 rruga u riemërua nga "Scorsone" në "Terranova", për nder të gjyqtarit Cesare Terranova i cili u vra nga njç atentat të ngritur nga mafia ndaj tij në vitin 1979 nga Luciano Leggio.
Walter Ra, i cili u zgjodh kryebashkiak i Corleone qershorin e kaluar, e përshkroi këtë lëvizje të "Salvuccio" Riina si "frikacake" dhe theksoi se qyteti ka lënë përfundimisht pas të kaluarën e tij të errët dhe nuk do t'i nënshtrohet asnjë forme frikësimi.
“Nuk do ta lejojmë. Kemi kthyer faqen, askush nuk do të na detyrojë të kthehemi në të shkuarën”, tha kryebashkiaku i sapozgjedhur duke folur për mediat italiane.
Në një deklaratë të lëshuar nga autoritetet, theksohet më tej se deklarata si ato të “Salvuccio” Riina “tingëllojnë si një sulm vulgar ndaj shtetit dhe institucioneve”.
“Gjithçka që ata bëjnë është të nxjerrin në pah një imazh negativ dhe të shtrembëruar të Corleone, duke minuar përpjekjet e përditshme të komunitetit për të hequr qafe reputacionin e lidhur me mafien dhe krimin. Corleone nuk është mafioz, Corleone është histori, kulturë, liri, por mbi të gjitha është ligjshmëri”.
Vlen të theksohet se “Salvuccio” Riina më vonë hoqi nga postimi referencën për “Via Scorsone”.
Corleone ishte vazhdimisht në qendër të vëmendjes në shekullin e 20-të si vendlindja e disa kryemafiozëve, si Bernardo Provenzano dhe "Toto" Riina.
Qyteti fitoi famë botërore përmes romanit të Mario Puzos The Godfather (1969) i cili përshkruan jetën e kryemafiozit imagjinar Vito Corleone dhe familjes së tij.
Në vitin 1972, filmi i parë me të njëjtin emër me Marlon Brando dhe Al Pacino u xhirua nën drejtimin e Francis Ford Coppola.
Filmi fitoi 3 çmime Oscar, ishte një hit mbarëbotëror dhe u pasua nga dy të tjera në 1974 dhe 1990.
"Toto" Riina vdiq në burg në vitin 2017.
I mbiquajtur "bisha" për shkak të mizorisë së tij, ai besohet se ka porositur më shumë se 150 vrasje, duke përfshirë vrasjen e një djali 13-vjeçar, trupi i të cilit më vonë u tret në acid.
Në fillim të viteve 1990, Riina urdhëroi shfarosjen e prokurorëve të Komisionit Antimafia, Giovanni Falcone dhe Paolo Borcellino , krime që tronditën Italinë dhe shkaktuan një mobilizim të madh në organet e ndjekjes.
Djali i tretë i kryemafiozit, "Salvuccio" Riina, u kthye përgjithmonë në Corleone në 2023 pasi kreu gati nëntë vjet burg për lidhje me mafien, pastrim parash dhe zhvatje./Versus.al
