Këto janë momentet kur policia ka ndërhyrë brenda një lokali në Gjirin e Lalëzit për të arrestuar të shumëkërkuarin Xhevdet Plaku “Akilin’ dhe 6 persona të tjerë me rrezikshmëri shoqërore, 3 prej të cilëve të shpallur në kërkim për vrasje.

Në momentin e ndërhyrjes së policisë, të arrestuarit po konsumonin drekë në një lokal krejtësisht të pashqetësuar pavarësisht se ishin të shpallur në kërkim.

Siç shihet edhe nga pamjet, në momentin e ndërhyrjes, policia gjeti edhe armë zjarri dhe shuma parash të cilat u sekuestruan në cilësinë e provës materiale. Versus.al

Fotomontazh: Viktima. Elis Rroshkodol, u vra nga Voltan Xhani

Ditën e sotme Policia e Durrësit mbajti një referatë për mediat ku zbuloi se është arrestuar në kuadër të operacionit “Ura”, Xhevdet Plaku së bashku me 6 persona në tjerë në ambientet e një restoranti në Durrës. Të 7 këta persona ishin të armatosur.

Ndër ta është arrestuar edhe Voltan Xhani.

Po kush është Voltan Xhani?

Voltan Xhani është i dyshuari kryesor për organizimin dhe vrasjen e Elis Rroshkodol në lagjen Ahmet Haxhiu në Shkodër mesditën e 30 gushtit 2024.

Elis Rroshkodol u ekzekutua teksa po pinte kafe në një lokal. Ai ishte i skeduar nga autoritetet belge si pjesë e një grupi kriminal që kryente grabitje, ndërsa ishte në kërkim nga Rumania për plagosje. Versus.al

Policia e Durrësit ka dalë në një konferencë për mediat për të zbuluar detaje lidhur me operacionin e zhvilluar ditën e sotme në qytetin bregdetar për kapjen e personave të shpallur në kërkim.

Në total janë arrestuar 7 persona, 3 prej të cilëve me rrezikshmëri të lartë shoqërore. Mes tyre është edhe Xhevdet Plaku, i njohur si ‘Akili’ i cili u kap brenda një lokali në Gjirin e Lalëzit ku iu gjet edhe një pistoletë me fishekë në fole gati për qitje.

Të arrestuarit:

1. Xhevdet Plaku, i shpallur në kërkim nga Italia për trafik ndërkombëtar droge. Më 23 janar të këtij viti u arratis nga burgu i Ankonës.

2. Flobens Meçja alias Gega alias Drini, 43 vjeç, banues në Shkodër, i shpallur në kërkim nga SPAK, pasi Gjykata e Shkallës së Parë për Korrupsionin dhe Krimin e Organizuar, në muajin korrik 2024, i ka caktuar masën e sigurisë “Arrest në burg”, për veprat penale “Organizata kriminale”, “Kryerja e veprave penale nga grupi i strukturuar kriminal” dhe “Sigurimi i kushteve dhe i mjeteve për të kryer vrasje”. Gjatë kontrollit, këtij shtetasi iu gjetën dy dokumente identifikimi të falsifikuara dhe 1 armë zjarri pistoletë me fishek në fole gati për qitje;

3. Voltan Xhani, banues në Holandë, në muajin shtator gjykata e Shkodrës i ka caktuar masën e sigurisë ‘arrest me burg’ pasi dyshohet se ka siguruar mjetet e transportit për të kryer vrasjen e Elis Rroshkodolit në Shkodër. Gjatë kontrollit iu gjet një armë pistoletë me fishekë në fole gati për qitje.

4. Jugert Xhani, i akuzuar për veprat penale “Prodhimi dhe mbajtja pa leje e armëve luftarake dhe e municionit”, “Moskallëzimi i krimit” dhe “Përkrahja e autorit të krimit”. Gjatë kontrollit iu gjetën 1 armë zjarri pistoletë dhe municion luftarak;

5. O.H. banues në Mamurras, i dyshuar për kryerjen e veprave penale “Moskallëzimi i krimit” dhe “Përkrahja e autorit të krimit”;

6. F. Q., 36 vjeç,  banues në Tiranë, për veprat penale “Moskallëzimi i krimit” dhe “Përkrahja e autorit të krimit”;

7. A. H., 45 vjeç, banues në Mamurras, i dyshuar për veprat penale “Moskallëzimi i krimit” dhe “Përkrahja e autorit të krimit.” 

Plaku u arrestua nën shoqërinë e Flobens Meçes dhe Voltan Xhanit teksa konsumonin ushqim në një restorant në Gjirin e Lalëzit. Gjatë kontrolleve u sekuestruan edhe shuma parash në euro dhe sende të tjera. Versus.al

Xhevdet Plaku, "Akili"

Gjatë operacionit të zhvilluar mëngjesin e sotëm në Durrës nga forcat “RENEA” është arrestuar Xhevdet Plaku, i njohur ndryshe me nofkën “Akili” për shkak se përdorte 25 identitete dhe u kishte shpëtuar atentateve të ndryshme.

Plaku më 23 janar të këtij viti ishte arratisur nga burgu i Ankonës në Itali. Ai dyshohet të jetë kreu i një grupi të trafikut të drogës në Holandë, po vuante dënimin për trafik droge.

Emri i Xhevdet Plakut doli dhe në dosjen e SPAK për grupin e trafikut të drogës pjesë e së cilës ishte dhe ish-shef i krimeve të Komisariatit nr. 6 Dedan Gjoni dhe Erzen Breçani.

Burgu i Ankonës nga ku u arratis Xhevdet Plaku

Zbardhja e përgjimeve të Sky ECC zbuluan se Akili, që përdorte 25 identitete, i akuzuar si kreu i një grupi të trafikut ndërkombëtar të drogës me qendër në Amsterdam u tentua të vritej nga i forti i Shijakut Rexhep Rapi më 17 shtator 2019. Përgjimet zbardhën bashkëpunimin e Rapit me Gjonin për të kryer vrasjen para komisariatit të Durrësit, si hakmarrje pasi e akuzonte për vrasjen e vëllat të tij Sali Rapi të ndodhur në 2014-ën në Itali.

Xhevdet Plaku, rreth 45 vjeç konsiderohet si kreu i një grupi të trafikut ndërkombëtar të drogës të cilin e drejtonte nga Amsterdami. Pakot me kokainë të pastër që vinin me porosi të tij, kishin logo marka të shtrenjta për të nënkuptuar cilësinë e lartë të saj. Në operacionet e policisë janë sekuestruar pako me logo të mbishkruar si më tej: Hermes, Lacoste, G4, Rolls Royce dhe Play Boy. Shqiptari aktualisht është i dënuar në Itali ku pritet që të bëhet edhe ekstradimi i tij. Versus.al

Në agimin e së premtes, dhjetëra forca policie, të mbështetura nga RENEA dhe Policia e Shtetit, zbarkuan në një megaoperacion në zonat e Shijakut, Sukthit dhe vetë zemrën e Durrësit.

Skenat e mëngjesit ishin larg rutinës së zakonshme– me sirena, bastisje dhe pranga. Sipas burimeve nga policia lokale, janë shoqëruar një numër i konsiderueshëm personash, por emrat dhe arsyet mbeten ende të pazbardhura.

Operacioni pritet të zbardhet më tej në orën 10:00, kur Drejtoria e Policisë së Durrësit do të mbajë një konferencë për shtyp. Versus.al