Një tjetër sukses i madh për sagën “Avatar”. Vetëm pak ditë pas daljes në kinema, filmi i tretë i James Cameron ka dominuar box-office-in në Shtetet e Bashkuara dhe Kanada, duke u renditur i pari gjatë fundjavës para Krishtlindjeve, sipas vlerësimeve të publikuara nga kompania Exhibitor Relations.
“Avatar: Zjarri dhe Hiri” ka arkëtuar 88 milionë dollarë në tregun e Amerikës së Veriut dhe plot 345 milionë dollarë në rang global gjatë fundjavës së parë të shfaqjes.
Sipas analistit David Gross nga Franchise Entertainment Research, filmi pritet të ketë një rrugëtim shumë të fortë edhe në tregjet ndërkombëtare. Ai thekson se “Avatar prek publikun në çdo cep të botës” dhe se ky kapitull i ri do të përfitojë nga një “fjalë goje shumë pozitive”.
“Filmat ‘Avatar’ nuk maten vetëm nga nisja. Ajo që bëjnë pas premierës është ajo që ka rëndësi,” u shpreh Gross.
Ashtu si në dy filmat e mëparshëm, në role kryesore rikthehen Sam Worthington dhe Zoe Saldana, si ish-marinsi Jake Sully dhe luftëtarja Neytiri, të cilët këtë herë përballen me një armik të ri që kërcënon familjen e tyre në planetin Pandora.
Në vendin e dytë të box-office-it nord-amerikan renditet filmi i animuar “David”, një rishikim i historisë biblike të Davidit dhe Goliathit, me 20 milionë dollarë të ardhura. I treti është “La femme de ménage”, bazuar në librin bestseller të Freida McFadden, me 19 milionë dollarë.
Në vendin e katërt debuton filmi i animuar “Bob Sfungjeri – Filmi: Një për të gjithë, të gjithë piratë!”, me 16 milionë dollarë, ndërsa pozicionin e pestë e mban “Zootopia 2” i Disney-t, me 14.5 milionë dollarë. Ky i fundit ka gjeneruar tashmë 1.27 miliardë dollarë në nivel global dhe është në garë për çmime Oscar.
Pjesa tjetër e top 10:
“Five Nights at Freddy’s 2” – 7.3 milionë dollarë
“Wicked: Pjesa II” – 4.3 milionë dollarë
“Dhurandhar” – 2.5 milionë dollarë
“Marty Supreme” – 875 mijë dollarë
“Hamnet” – 850 mijë dollarë
