Alisa Gjimshiti, e njohur më parë si Alisa Milenković, është bashkëshortja e futbollistit të Kombëtares Shqiptare dhe lojtarit të Atalantës, Berat Gjimshiti. Gjatë ndeshjes së shumëpërfolur mes Shqipërisë dhe Serbisë, e cila përfundoi pa gola në stadiumin "Air Albania", Alisa nuk ishte e pranishme në tribunë — ajo ndodhej në një destinacion krejt tjetër.
Sipas burimeve, gjatë kohës që zhvillohej takimi në Tiranë, Alisa ndodhej në Mal të Zi së bashku me fëmijët e saj. Ajo është parë të shijojë ditën me familjen, madje edhe duke bërë një udhëtim të qetë me varkë, larg tensioneve që e rrethuan sfidën në kryeqytet.
Berat Gjimshiti dhe Alisa janë bashkë që nga viti 2013, kur lojtari shqiptar aktivizohej me skuadrën e Zyrichut në Zvicër. Marrëdhënia e tyre ka ngjallur komente dhe reagime të shumta në të dyja anët, për shkak të prejardhjes së ndryshme etnike.
Megjithatë, Berat është treguar i përmbajtur kur është pyetur nga gazetarët për jetën e tij personale përpara sfidës me Serbinë. Ai u përgjigj shkurt:
“Kemi ardhur këtu për futboll, jo për të folur për jetën time private dhe familjen time, e cila gjithmonë më mbështet në çdo moment.”
Kush është Alisa Gjimshiti?
Alisa është një modele me një profil të lartë. Ajo ka studiuar ekonomi në Zvicër dhe është diplomuar në marketing ndërkombëtar. Aktualisht, ajo është themeluese dhe drejtuese e markës së modës "Jalize", një brand që po fiton vëmendje për stilin modern dhe cilësinë.
Pavarësisht komenteve apo paragjykimeve që shpesh vijnë nga jeta e saj personale, Alisa ka ndërtuar një profil të suksesshëm si nënë, bashkëshorte dhe sipërmarrëse. Me praninë e saj diskrete por të qëndrueshme, ajo vazhdon të jetë një figurë mbështetëse në jetën e futbollistit shqiptar.
