Në mbledhjen e sotme të Komisionit për Ekonominë dhe Financat, deputeti i Partisë Socialiste, Erion Braçe, ka reaguar ashpër dhe me tone të larta kundër mënyrës se si po trajtohet çështja e skemës së re të TVSH-së për sektorin e bujqësisë. Braçe deklaroi publikisht se kjo mund të jetë puna e tij e fundit në Kuvend, duke lënë të kuptohet se mund të dorëhiqet nga mandati i deputetit.
“Meqë është puna ime e fundit në Kuvend, unë do jem shumë i kënaqur që kjo do të votohet kundër në Kuvend dhe të shoh në sy Petrit Malajn që bën fushatë në Divjakë”, tha Braçe.
Shkak i revoltës së tij ishte diskutimi mbi një projektligj të propozuar prej tij, i cili parashikon ndryshime në skemën e rimbursimit të TVSH-së për fermerët dhe prodhuesit bujqësorë, me qëllim, sipas Braçes, që të mbështetet më shumë bujqësia vendase dhe të korrigjohen padrejtësitë e krijuara ndaj fermerëve nga skema aktuale.
Megjithëse Komisioni për Ekonominë miratoi projektligjin, Komisioni Qendror i Zgjedhjeve shprehu shqetësime serioze. Sipas KQZ-së, miratimi i këtij projektligji ka potencialin të ndikojë në procesin zgjedhor, duke pasur parasysh që ndryshimet në skemën fiskale mund të perceptohen si një masë me ndikim elektoral, në prag të zgjedhjeve.
Reagimi i Braçes u karakterizua nga zhgënjimi dhe pakënaqësia e thellë ndaj vendimmarrjeve politike që, sipas tij, nuk mbrojnë interesat e vërteta të fermerëve shqiptarë.
Ai theksoi se angazhimi i tij politik ka qenë gjithmonë në mbrojtje të bujqësisë dhe fermerëve, por u shpreh i lodhur nga pengesat dhe mungesa e vullnetit për të bërë ndryshime reale në këtë sektor jetik për ekonominë shqiptare. /Versus.al/
