Një ish-punonjës policie u vu në pranga, pasi akuzohet për shpërdorim detyre. Klinsman Nikolli, sipas burimeve zyrtare të Agjensisë së Mbikqyerjes Policore i është dhënë nga Gjykata e Lezhës masa e sigurisë “arrest me burg” i dyshuar për kryerjen e veprës penale “Shpërdorimi i detyrës”.
Dy vite më parë ish-oficeri Klinsman Nikolli, u shpall në kërkim nga AMP, pasi dyshohej se gjatë ushtrimit të detyrës në Komisariatin e Lezhës, ka lejuar kultivimin e kanabisit në zonën e Njësisë Administrative Ungrej.
Por kjo nuk është e vetmja pikë e errët e të kaluarës së Klinsman Nikollit, i cili mësohet se është djali i një dëshmori të Policisë së Shtetit.
Polic në Shqipëri, “skifter” në Itali?
Dy vjet më parë, në nëntor të 2022, Nikolli, asajkohe 27 vjeç u arrestua në Itali duke vjedhur vila dhe për këtë arsye u largua nga rradhët e policisë së shtetit.
Pas arrestimit nga autoritetet italiane, Policia e Shtetit pati saktësuar se Klinsman Nikolli kishte qenë me detyrë si oficer i Patrullës së Përgjithshme në Postën e Policisë së Shëngjinit dhe se në momentin e arrestimit kishte qenë me leje pa të drejtë rroge.
Klisman Nikolli u arrestua nga policia italiane bashkë me dy shqiptarë të tjerë, Viktor Bilanin, 30 vjeç, e Flor Kocën, 35 vjeç. Ata u a akuzuan gati dy vjet më parë për grabitjen e 18 vilave dhe banesave në territoret e komunave Portogruaro, Concordia Sagittaria, San Michele al Tagliamento, Azzano Decimo, Chions e Musile di Pia, të rajoneve Veneto e Friuli. Të tre shqiptarët u arrestuan pak orë para se të udhëtonin drejt Shqipërisë me mallin e grabitur.
Nuk është ende e qartë sesi ka arritur të rikthehet kaq shpejt nga Italia Klinsman Nikolli pas akuzave të ngritura në vendin fqinj, por tashmë ai do të përballet me drejtësinë shqiptare për “shpërdorim detyre”.
