Prokuroria e Posaçme ka dërguar për gjykim dosjen në ngarkim të Amarildo Nikollit, të njohur me nofkën “shkodrani” i cili kishte në plan të vriste Inez Hajrullën dhe Ervis Matodashajn në Vlorë.
Sipas detajeve të mësuara, Nikollit i ishin ofruar rreth 500 mijë euro nga Leonard Luzi për të kryer vrasjen. Në bashkëpunim me Muharrem Koroveshin dhe Erio Zejnon, “shkodrani” po planifikonte vrasjen e “të fortit të Vlorës” Inez Hajrullës dhe shokut të tij Ervis Matodashajt.
Sipas hetimeve të SPAK, por edhe në bazë të dëshmisë së dhënë nga Amarildo Nikolli i cili rrëfeu planin, krimi do të kryhej për hakmarrjë dhe për marrjen nën kontroll të lojërave të fatit. Ndërkohë, porositësi Leonard Luzi u ekstradua muaj më parë nga Spanja nën akuzën e ngritjes së grupit kriminal për vrasje.
Plan për vrasjen e Hajrullës dhe Matodashajt mbeti vetëm në letër pasi në gusht të vitit të kaluar, “shkodrani” u jap nga policia në lagjen “Uji i Ftohtë” dhe gjatë kontrollit të kryer iu gjet pistoleta Beretta. Vetë Nikolli pasi u arrestua vendosi të bashkëpunojë me drejtësinë duke u kthyer në “të penduar” dhe zbuloi se ditën kur iu vunë prangat, kishte planifikuar kryerjen e krimit.
Nikolli edhe pse në burg, u kthye në personazh mjaft të përfolur gjatë muajit korrik të këtij viti pas shpërthimit me tritol në banesën e marrë me qira nga dy motrat Xhovana dhe Alda Nikolli në Elbasan. Shpërthimi i mori jetën 26 vjeçarit të pafajshëm Enea Themollari i cili luftoi për 2 muaj në spital.
Ndërsa motrat Nikolli akuzuan të penduarin e drejtësisë Nuredin Dumanin si porositës për vendosjen e tritolit, gjë që sipas tyre po bëhej si hakmarrje nga ana e vrasësit me pagesë ndaj të burgosurit Amarildo Nikolli me të cilin njëra prej motrave kishte lidhje. Versus.al
