Policia e Elbasanit ka zbardhur ngjarjen e ndodhur mesnatën e djeshme, ku një 59-vjeçar tentoi të vriste me thikë një 26-vjeçar.
Në kuadër të operacionit “Mesnata” u bë e mundur zbardhja e ngjarjes, identifikimi dhe arrestimi i autorit të dyshuar, shtetasit Anton Kasa, 59 vjeç, banues në Elbasan.
Sipas policisë së qytetit të Elbasanit, 59-vjeçari ka qenë në gjendje të dehur. Për këtë rast është ndaluar edhe mjeku roje i spitalit, pasi nuk ka shënuar në kartelën mjekësore asnjë informacion mbi mjekimet e dhëna të pacientit.
Nga veprimet hetimore rezultoi se shtetasi A. K., mesnatën e djeshme, në lagjen “Haxhias”, në gjendje të dehur, ka tentuar të vrasë me mjet të mprehtë (thikë) shtetasin D. B., 26 vjeç, banues në Elbasan, i cili ka shkuar në spital për ndihmë mjekësore.
Po nga veprimet hetimore ka rezultuar se mjeku i rojes, në spitalin ku ka marr mjekim 26-vjeçari, nuk ka shënuar në kartelën mjekësore asnjë informacion mbi mjekimet e dhëna të pacientit. Për këtë arsye Prokuroria ka urdhëruar ndalimin e tij.
Urdhër ndalimi i Prokurorisë është ekzekutuar nga specialistët për Hetimin e Krimeve të Komisariatit të Policisë Elbasan, të cilët kanë ndaluar mjekun roje në spitalin ku ka marrë mjekim 26-vjeçari, shtetasin K. D., 32 vjeç, për veprën penale “Shpërdorimi i detyrës”.
