Më 26 shtator 2023, një biznesmen ndërtimi në Tiranë mori një mesazh në “Telegram” nga një numër i panjohur, me përmbajtjen:
“Përshëndetje! Jam Erion Veliaj. Një mikut tim i nevojiten 70 mijë euro. Rregullohemi bashkë diku tjetër”.
Edhe pse mesazhi pretendonte të ishte nga kryebashkiaku i Tiranës, pas tij fshihej një 28-vjeçar nga Elbasani, Xhensil Qefa-Hida, i cili po përpiqej të realizonte një skemë mashtrimi.
Biznesmeni me inicialet G.A. u tregua i gatshëm të dorëzonte shumën dhe u udhëzua fillimisht ta çonte në Vlorë, pastaj në një restorant pranë Lushnjës dhe në fund në një qendër tregtare te Kthesa e Kamzës në Tiranë.
Por, në vendin e takimit, gjithçka ishte një kurth i organizuar nga policia. Në vend të eurove, në çantë kishte letra, dhe në momentin e dorëzimit, policia ndërhyri duke arrestuar Leonard Xhikën – personin që kishte ardhur për të marrë “paratë”.
Pasi u ndalua, Xhika kontaktoi me organizatorin, duke i thënë se paratë ishin marrë, çka çoi në identifikimin e katër personave të tjerë të përfshirë në skemë.
Vendimi i Gjykatës:
Gjykata e Tiranës shpalli fajtorë për "mashtrim të mbetur në tentativë":
Xhensil Qefa-Hida (në mungesë), organizatori kryesor, u dënua me 3 vite burg.
Leonard Xhika, që shkoi të merrte paratë, u dënua po ashtu me 3 vite, por për shkak të gjykimit të shkurtuar, dënimi iu ul në 2 vite. Gjykata vendosi që ai të mos shkojë në burg, por të jetë në Shërbim Prove për 4 vite.
Xhika ka deklaruar se kishte komunikuar me Qefën përmes “Telegram”-it dhe ishte udhëzuar të merrte një shumë prej 20 mijë eurosh, duke mbajtur 3 mijë për vete.
Të dënuar për “moskallëzim krimi”:
Mikel Panxhi
Xhonatan Xhaferri
Petro Ferzaj
Të tre këta persona u dënuan me nga 8 muaj burgim, pasi nuk kishin kallëzuar rastin, edhe pse ishin kontaktuar nga Qefa për të marrë dhe shpërndarë para të dyshuara. /Versus.al
