Ish-kryetari i Bashkisë, Jorgo Goro, i cili ishte dënuar për shpërdorim detyre dhe fshehje pasurie, është liruar nga burgu që më 12 gusht.
Dënimi i tij ishte lidhur me veprime gjatë kohës që Goro mbante postin e kryetarit të Bashkisë, ku hetimet zbuluan shkelje në menaxhimin e pronave dhe fondeve publike.
Sipas vendimeve të gjykatës, ai ishte i përfshirë në fshehjen e pasurive, duke mos deklaruar të ardhurat dhe pronat që zotëronte, çka përbën një nga format e shpërdorimit të detyrës publike.
Ish-kryetari i Bashkisë Himarë u shpall fajtor për shpërdorim detyre në dy raste.
Dënimi fillestar i vendosur nga Gjykata e Posaçme për Korrupsionin dhe Krimin e Organizuar ishte 3 vjet e 1 muaj burgim.
Megjithatë, duke aplikuar gjykimin e shkurtuar, dënimi i tij u reduktua në 2 vjet e 20 ditë heqje lirie.
Goro akuzohet se në bashkëpunim me vartës dhe zyrtarë të Kadastrës ka mundësuar kalimin e sipërfaqeve të konsiderueshme tokë shtet në Himarë në favor të privatëve, përfshirë prona të zotëruara nga një shoqëri e Artan Gaçit, bashkëshortit të deputetes Olta Xhaçka. Për këto pasuri u vendos konfiskimi dhe kalimi i tyre në llogari të shtetit.
Ish-kryebashkiaku ka edhe një tjetër dosje penale në ngarkim, për të cilën u dënua me 2 vite burg nga GJKKO në shkallën e parë më 30 korrik 2025, por nuk ka marrë ende formën e prerë. Nëse shpallet fajtor, duhet të vuajë 1 vit e 4 muaj heqje lirie dhe heqja e të drejtës për të mbajtur funksione publike për 5 vite. Versus.al
