Mbrëmjen e djeshme në emisionin “Opinion”, gazetarja Klodiana Lala ka dhënë detaje rreth shënjestrave të atentatit të Rinasit, viktimës Gilmando Danit dhe të plagosurit Muçi Shaljani i cili rezulton edhe agjent i AMP.
Lala tha se Gilmando Dani i cili njihej si krahu i djathtë i Emiljano Shullazit, shoqërohej gjatë gjithë kohës nga Muçi Shaljani dhe qëndronte në hotelin e tij "RAMEL" i cili ka zënë hapësirë publike në Tiranë.
Gazetarja e cilësoi tepër të çuditshëm faktin se për një ish-të dënuar si Gilmando Dani nuk është mbajtur procesverbal.
"Gilmando Dani shoqërohej gjithë kohën me Muçi Shaljanin. E çuditshme se si policia nuk ka asnjë procesverbal për këtë ish të dënuar. Ai rrinte me Muçin dhe qëndronte në hotelin e tij që ka zënë hapësirën publike në Tiranë"-tha Lala.
Muçi Shaljani merrej me marrjen dhe dhënien me qira të pasurive të paluajtshme dhe prej vitit 2018, kishte në pronësi një hotel në Tiranë. Versus.al
