Sot në orën 09:30 do të mbahet seanca praprake për dosjen ‘Partizani’ në GJKKO pas disa muajsh shtyrjesh të vazhdueshme. Seanca e fundit u shty për shkak se njëri prej avokatëve të të pandehurve ishte në një tjetër gjyq.
Në seancën e sotme pritet të vendoset nëse ish-kryeministri Sali Berisha, dhëndri i tij Jamarbër Malltezi dhe tre të pandehurit e tjerë do të kalojnë për gjykim. Dy mundësitë e tjera janë që çështja të pushohet ose të kthehet mbrapsht për plotësim hetimesh.
Avokatët e Berishës, Genc Gjokutaj dhe Sokol Mëngjesi kanë mbërritur në GJKKO. Ata kërkojnë pushim të çështjes me pretendimin se nuk ka vepër penale.
Hetimet nga SPAK u mbyllën në shtator të vitit të kaluar, ndërsa prej tetorit, seancat janë shtyrë në mënyrë të vazhdueshme nëpërmjet justifikimeve të ndryshme. Në dy herët e fundit avokatët, një herë i Malltezit e më tej i të pandehurit Xhimi Begeja paraqitën raporte mjekësore si të sëmurë.
Ditën e djeshme Gjykata e Lartë rrëzoi kërkesën e bërë nga Sali Berisha për përjashtimin e trupës gjykuese nga shqyrtimi i rekursit të bërë prej tij sa i takon masës “detyrim paraqitje” për këtë aferë. Prej nëntorit, Berisha u lirua nga arresti shtëpiak dhe tashmë duhet të respektojë vetëm masën “detyrim paraqitje” në GJKKO.
Të pandehurit për dosjen ‘Partizani':
Sali Berisha, ish kryeministër akuzohet për “Korrupsionit pasiv të funksionarëve të lartë shtetërore ose të zgjedhurve vendorë”, kryer në bashkëpunim, me Jamarbër Malltezin parashikuar nga neni 260 e 25 i Kodit Penal.
Jamarbër Malltezi, dhëndri i ish-kryeministrit, akuzohet për “Korrupsioni pasiv të funksionarëve të lartë shtetërore ose të zgjedhurve vendorë”, kryer në bashkëpunim me Sali Berishën pasi në marrëveshje me këtë të fundit, duke shfrytëzuar pushtetin e ish Kryeministrit, ka arritur të marrë përfitimet e parregullta! Akuzohet dhe për “Pastrimit të produkteve të veprës penale ose veprimtarisë kriminale”, parashikuar nga neni 287 paragrafi i dytë i Kodit Penal
Fatmir Bektashi, Ndërtuesi, akuzohet “Korrupsionit aktiv të funksionarëve të lartë shtetërorë”, parashikuar nga neni 245 i Kodit Penal dhe 'pastrim parash'
Xhimi Begeja, ortaku i Malltezit, trashëgimtar i tokës dhe bashkëpronar i 'Homeplan' akuzohet për 'Pastrim Parash'
Andia Pustina - Financierja që kryente të gjitha operacionet financiare dhe ligjore të Homeplan sh.p.k - Akuzohet për 'Pastrim Parash'. Versus.al
