Leonard Luzi, 47 vjeçari i akuzuar se planifikoi dhe pagoi për vrasjen e mbetur në tentativë të Inez Hajrullës (të fortit të Vlorës) dhe Ervis Matodashajt, është arrestuar në Spanjë.
Luzi akuzohet se në 8 gusht të vitit 2023 në bashkëpunim me persona të tjerë, kishte planifikuar vrasjen e Ervis Matodashajt dhe Inez Hajrullës. Krimi u parandalua falë ndërhyrjes së policisë që arrestoi Amarildo Nikollin të njohur me nofkën “shkodrani” i cili ishte paguar për kryerjen e vrasjeve.
Si nisi etja e Leonard Luzit për vrasjen e Hajurllës dhe Matodashajt?
Sipas hetimeve të SPAK, vrasje e Matodashajt dhe Hajrullës është porositur për hakmarrje dhe për marrjen nën kontroll të lojërave të fatit. Në datën 22 mars të vitit 2013, në Vlorë është ekzekutuar me armë zjarri Erigert Zejno, kushëri i parë i Leonard Luzit i cili mban gjithashtu mbiemrin Zejno. Për këtë ngjarje u arrestuan Ervis Matodashaj, Nadir Ferko dhe Altin Sejdiraj.
Një vit më vonë, në 21 prill të 2014-ës, gjykata e Vlorës pushoi hetimet për Matodashajn dhe 2 të arrestuarit e tjerë për mungesë provash. Në këtë moment kanë nisur edhe përpjekjet e Luzit për vrasjen e Matodashajt dhe Hajrullës i cili dyshohet si i përfshirë.
Për të kryer vrasjen e këtyre të dyve, Leonard Luzi kishte kontaktuar Amrildo Nikollin i cili njihet ndryshe si “shkodrani”. Ky i fundit u arrestua nga policia në gusht me një pistoletë me silenciator dhe fishekë gati për qitje. 6 muaj më vonë ai rrëfeu planin për vrasjen e Hajrullës duke nxjerrë edhe emrin e Luzit.
Tashmë autoritetet shqiptare kanë nisur procedurat për ekstradimin e Leonard Luzit drejt Shqipërisë. Ndërsa emri i tij u përmend edhe nga Alda Nikolli, kunata e Amarildo Nikollit të cilës iu vendos tritol 2 ditë më parë, ngjarje për të cilën ajo akuzoi Nuredin Dumanin. Në rrëfimin që Nikolli bëri për TCH, Alda tha se Nuredin Dumani kishte dhunuar kunatin e saj Amarildo Nikolli në burg dhe i kishte vendosur 400 mijë euro gjobë. Ndërsa kishte qëllim që t’i vinte gjobë edhe Leonard Luzit, i cili u arrestua nga autoritetet spanjolle. Versus.al
