Këngëtari Gerald Xhari, i njohur me emrin e artit Big Basta, ka qenë ditën e sotme i ftuar në emisionin “S’e Luan Top”, ku ka bërë një rrëfim emocional.
Big Basta rrëfeu arsyet që e bënë të largohej nga Shqipëria drejt një shteti të largët, në Zelandën e Re.
Artisti tregoi se ndihej i zhgënjyer kur mori këtë vendim drastik.
“Doja një opsion të dytë. Isha shumë i zhgënjyer. Kalova një periudhë jo të lehtë, sidomos duke parë artistë që nuk e meritonin të ishin aty ku ishin. Por, kush jam unë t’i gjykoj nga ana tjetër. Pata disa bërryla të pakëndshëm. Vesa ka qenë afër meje çdo sekondë, sepse pata një thyerje mendore shumë të madhe. Nuk arrija dot të krijoja atë që unë doja. Shpesh krijoja çfarë donin njerëzit, kjo është vrastare për artin. Mendoja se po të rrija në Shqipëri, me shqiptarët do të bëhesha më keq, mendoja. Doja të rrija sa më larg, prandaj zgjodha Zelandën e Re”, tha Big Basta.
Ndonëse në atë periudhë u përfol për një ndarje mes tij dhe Vesa Lumës, Big Basta tha se artistja i qëndroi pranë në çdo çast.
“Edhe Vesa nuk e pati shumë të lehtë rënien time. Unë e gjeta një zgjidhje që të rikrijoja veten time. Fakti që u ktheva, do të thotë që jam më i fortë se atëherë. Bashkë me Vesën kemi krijuar një mburojë, që nuk besoj se ka djaj që do të mund ta depërtojnë”, u shpreh këngëtari.
Big Basta ka treguar se si nisi karriera e tij muzikore dhe si i ngeli ky emër arti.
Reperi i dashur për publikun u shpreh se Big Basta ia ka vendosur Dr. Flori dhe ai ka qenë si një mentor për të.
Pjesë nga intervista:
Erjona Rusi: Adoleshent ke qenë fans i zjarrtë i 2Pac, saqë në gjimnaz te “Sami Frashëri” e thërrisnin “Geri 2Pac”. Të patën dërguar edhe nga jashtë një album që pate mësuar të gjitha këngët për mëndësh. Aty fillon rrugëtimi i karrierës, në gjimnaz
Big Basta: Po, sepse aty u dashurova me një këngë specifikisht. Por kontenti dhe gjithçka që këngë kishte, muzika, ishte e jashtëzakonshme. Edhe unë u dashurova menjëherë e thashë ‘sa bukur, ky recitim ritmik’. Pastaj ishte vetëm fillimi, në shtëpinë time flitej vetëm hip hop, rap.
Erjona Rusi: Në gjimnaz ka qenë një shok, Shpati Kadiu, i cili krijoi një grup dhe të ftoi te studio e Dr. Florti dhe Alban Kondit. Pastaj nga ai moment ti nuk u ndave nga muzika
Big Basta: Shumë e vërtetë, duke qenë se mua me thonin Ger 2Pac që kisha lidhje me muzikën thjesht si dëgjues, asnjë nuk më vuri në provë. As vetes nuk i dhashë mundësi se nuk e mendoja veten kurrë pjesë e showbizz-it ose artit shqiptar. Shpati erdhi aty dhe më tha ne kemi qejf të jesh pjesë e këngës së re. E dimë që e ke qejf hip hop, të paktën futu e provoje. Shkova, aty ishte Dr. Flori i ndjeri, Flori Mumajesi që punonin bashkë, Turi, Fabi, “Produkt 28” dhe Albani. Më dukej veta si në “Voice”. Tekstin e kisha gati se e kishte bërë Turi, muzikë e vjedhur si në atë kohë. U futa, e regjistrova me të parën dhe thanë ‘do ta mbajmë këtë’.
Erjona Rusi: Dr. Flori e vendosi emrin Big Basta apo jo?
Big Basta: Po
Erjona Rusi: Si?
Big Basta: Unë në “Top Fest” 2 ose 3 kam marrë pjesë me emrin Bastard. Ajo ka qenë hera e fundit pasi Dr. Flori më tha ‘ej ku je duke shkuar me këtë emër’. Unë i thashë se është shumë i bukur dhe ai më tha ‘jo se nuk janë gati shqiptarët për këto lloj emrash, do të tallen me ty, do rri me ty kjo e tallur gjatë gjithë jetës tënde. Pastaj ti nuk je bastard’. I thashë si ta vë? Kemi qenë te shtëpia e doktorit të mrekullueshëm. Ai tha Big Basta, duket se e kishte menduar përpara.
Erjona Rusi: Krijove miqësi me Dr. Florin?
Big Basta: Po, shumë miqësi në atë kohë sepse për mua ishte si mentor. Karriera e tij ishte e madhe, e larmishme, tekstet e tij kanë qenë të jashtëzakonshme, mesazhe, tematika sociale, e në një far forme po e vazhdoj atë lloj stili të atij, pavarësisht se kam stilin tim.
Erjona Rusi: Të ka shënjuar vdekja e tij tragjike?
Big Basta: Shumë. Ishte tragjike. Kur mora vesh për vdekjen e tij ishte e tmerrshme. Një nga arsyet kur lindi djali dhe pse vendosa ta provoj jashtë shtetit, ishte dhe shenja që kishte lënë vdekja e Dr. Florit. Sepse të jetosh në një vend si Shqipëria dhe të shikosh një artist të madh të na lërë për hiç gjë, sepse nuk përballonte dot X dhe Y…
Erjona Rusi: Kishe frikë për të ardhmen e djalit po thua?
Big Basta: Patjetër sepse fatkeqësisht po të shikosh edhe artistët e vjetër në Shqipëri, shumë lehtësisht mund t’i gjesh me ato veshjet e vjetra duke marrë rroga shumë të vogla dhe me biçikleta duke shkuar për punë, është e dhimbshme.
