Kancelari gjerman Olaf Scholz në një dalje për mediat ka bërë me dije se do të forcojë masat kundër emigracionit të paligjshëm pas sulmit terrorist të ndodhur ditë më parë ku një emigrant sirian u arratis nga një qendër strehimore dhe vrau me thikë 3 persona e plagosi 8 të tjerë.
"Tani do të na duhet të forcojmë rregullat e armëve... veçanërisht në lidhje me përdorimin e thikave. Gjithashtu ne do të bëjmë gjithçka që mundemi për të siguruar se ata të cilët nuk mund të qëndrojnë në Gjermani, të deportohen për në vendet e tyre”- tha Scholz gjatë një vizite në Solingen, vendin ku ndodhi sulmi.
Sulmi i së premtes në një festival rruge, i cili la tre persona të vdekur dhe plagosi tetë të tjerë, ka tronditur vendin dhe ka nxitur një debat të rinovuar rreth imigracionit përpara zgjedhjeve kryesore rajonale fundjavën e ardhshme.
Pas një dite në arrati, një 26-vjeçar sirian iu dorëzua autoriteteve të shtunën vonë. Prokurorët gjermanë të antiterrorizmit kanë marrë përsipër hetimet dhe personi i quajtur Issa Al H. është arrestuar me dyshimin për vrasje, tentativë vrasje dhe i përkiste një “grupi terrorist”.
Grupi i Shteti Islamik (ISIS) tha në një deklaratë të shtunën se një nga anëtarët e tij e kishte kryer sulmin në "hakmarrje" për myslimanët "në Palestinë dhe kudo".
“Autori i sulmit në një tubim të krishterësh në qytetin Solingen në Gjermani ishte një ushtar i Shtetit Islamik”, thuhet në një deklaratë nga agjencia e lajmeve e xhihadistëve Amaq në aplikacionin e mesazheve Telegram. Versus.al
