I dyshuari për sulmin, Col Tomas Alen, u ka dërguar anëtarëve të familjes së tij një manifest kundër presidentit të SHBA-së Donald Trump vetëm dhjetë minuta para se të hapte zjarr në darkën e gazetarëve të Shtëpisë së Bardhë, raportoi New York Post.
Në një intervistë për Fox News, Trump e cilësoi si “person të sëmurë” pasi kishte lexuar dokumentin.
“Ky është një person i sëmurë kur lexon manifestin e tij. Ai i urren të krishterët, kjo është e sigurt… dhe mendoj se për këtë e kishin paralajmëruar edhe motra apo vëllai i tij”, u shpreh Trump.
Ai shtoi se familja dyshohet se kishte kontaktuar më herët policinë për shkak të sjelljes së tij.
Sipas mediave amerikane, në manifest i dyshuari ka shpjeguar motivet e tij dhe ka deklaruar se kishte në shënjestër zyrtarë të administratës Trump, të cilët i konsideron përgjegjës për vendime politike që ai i kritikon.
Prokurori i Përgjithshëm në detyrë Todd Blanch pranoi gjithashtu në një intervistë në emisionin "Meet the Press" të NBC-së se i dyshuari kishte " disa shkrime ".
Blanch kishte thënë më parë se i dyshuari dukej se po synonte zyrtarët e administratës Trump, por se hetimi për motivin e tij ishte ende në fazat e hershme.
"Epo, ata kanë informacion mjaft të mirë", tha Trump për Fox News në lidhje me progresin e hetimit për motivin e të dyshuarit. "Ai kishte shumë urrejtje në zemrën e tij për një kohë të gjatë... Ishte një gjë fetare, ishte shumë antikristiane", tha ai.
Donald Trump shtoi gjithashtu se ai dhe Melania Trump ishin mirë.
"Ata janë mirë. Unë jam mirë. Ishte një natë shumë e trishtuar në shumë mënyra. Por ishte gjithashtu një natë që bashkoi shumë njerëz", tha Trump.
Trump përsëriti gjithashtu qëndrimin e tij për nevojën e ndërtimit të një salle të re vallëzimi në Shtëpia e Bardhë, duke deklaruar se projekti po ecën përpara afatit dhe brenda buxhetit të parashikuar./Versus.al
