Probleme të mëdha për qindra fluturime për dhe nga Gjermania sjell moti i keq që prek Evropën qendrore dhe perëndimore. Tashmë, anulime dhe vonesa kanë ndodhur në aeroportet e Frankfurtit, Mynihut dhe Shtutgartit.
Problemet më serioze janë konstatuar në aeroportin e Frankfurtit, të paktën 120 ngritje dhe ulje nga 1090 që ishin planifikuar fillimisht për sot janë anuluar tashmë, tha një përfaqësues i kompanisë menaxhuese të aeroportit, Fraport, për agjencinë gjermane të lajmeve DPA. Pistat duhej të pastroheshin, sepse shikueshmëria ishte e dobët dhe procesi i ngrirjes së akullit të avionit po shkaktonte vonesa të gjata për shkak të motit.
Në aeroportin e Mynihut , problemet janë më të kufizuara, me pak vonesa në ekzekutimin e orarit të fluturimeve, si dhe në Shtutgart, ku shërbimet kërkojnë që pasagjerët të mbërrijnë në aeroport shumë më herët.
Probleme nga moti i keq vihen re edhe në funksionimin e hekurudhave, kryesisht në zonën e Frankfurtit, ndërsa autoritetet rekomandojnë që drejtuesit e mjeteve të kenë kujdes të veçantë në rrugët ku mund të ketë borë apo akull. Në Saksoninë e Poshtme, Bavari dhe Turingi, që nga mbrëmja e djeshme janë regjistruar rreth 120 aksidente rrugore, por pa lëndime të rënda.
