Një sasi e madhe prej 1.2 tonë kokainë është sekuestruar nga dogana belge në portin e Anversës gjatë natës mes së shtunës dhe së dielës, njoftuan autoritetet belge, përfshirë Shërbimin Publik Federal të Financave (SPF Finances) dhe Prokurorinë e Anversës.
Në kuadër të operacionit janë arrestuar dhjetë persona, mes tyre edhe një i mitur vetëm 14 vjeç, një fakt që ka tronditur opinionin publik.
Lënda narkotike ishte fshehur në një anije të quajtur "Grande Africa", e cila kishte ndaluar në portin e Anversës pas një itinerari përmes kontinentit afrikan.
Sipas zëdhënëses së prokurorisë, Kato Belmans, kjo sekuestrim është rezultat i një hetimi në vazhdim nga Policia Gjyqësore Federale (PJF) e Anversës, e cila po heton një rrjet kriminal ndërkombëtar që dyshohet për trafik droge përmes portit të Anversës.
Operacioni u zhvillua në bashkëpunim me Policinë Detare dhe Njësitë Speciale DSU, ndërsa arrestimet u kryen në rajonin e Zelzate, përfshirë një magazinë ku dyshohet se do të fshihej apo shpërndahej droga.
Të arrestuarit përfshijnë shtatë shtetas holandezë dhe tre belgë. Të rriturit do të paraqiten para gjyqtarit hetues, i cili do të vendosë për masën e sigurisë, ndërsa i mituri 14-vjeçar do të paraqitet para gjykatës për të mitur.
Hetimet janë ende në vazhdim dhe po zhvillohen nën mbikëqyrjen e gjyqtarit hetues dhe në drejtimin e Policisë Gjyqësore Federale të Anversës.
