Një nga ngjarjet më tronditëse të viteve të fundit në Belgjikë pritet të shqyrtohet së shpejti në gjykatë, gjashtë vjet pas vdekjes së një djali 2-vjeçar, i cili humbi jetën nga një mbidozë ilaçesh kundër dhimbjeve.
Ngjarja ndodhi në shkurt të vitit 2020 në qytetin Torhout. Vogëlushi Aro ndërroi jetë disa ditë pasi kishte kryer një ndërhyrje për heqjen e bajameve. Fillimisht u mendua se bëhej fjalë për një aksident tragjik, por analizat toksikologjike zbuluan se në organizmin e tij kishte nivele shumë të larta të disa medikamenteve kundër dhimbjeve.
Sipas hetimeve, nëna e tij, Stefanie V., i kishte administruar fëmijës kombinime të ndryshme ilaçesh, përfshirë Dafalgan, Perdolan dhe Nurofen. Autoritetet pretendojnë se në ditën e vdekjes djali kishte marrë shtatë supozitorë brenda rreth dhjetë orësh, një sasi që tejkalonte ndjeshëm dozën e rekomanduar.
Pas një hetimi që zgjati gjashtë vjet, prokuroria belge ka vendosur ta dërgojë çështjen në gjykatë. Gruaja akuzohet për administrim të substancave të dëmshme që çuan në vdekjen e fëmijës, pa qëllim vrasjeje.
Babai dhe gjyshi i vogëlushit kanë folur publikisht për herë të parë, duke deklaruar se kërkojnë drejtësi dhe jo hakmarrje. Sipas tyre, hetimet kanë nxjerrë në pah se fëmija kishte marrë qetësues dhimbjesh në mënyrë të përsëritur për një periudhë të gjatë.
Nga ana tjetër, nëna ka deklaruar se synimi i saj ishte vetëm të lehtësonte dhimbjet e djalit dhe se nuk kishte dijeni se po vepronte gabim. Avokati i saj ka theksuar se klientja vazhdon të jetë e rënduar emocionalisht nga humbja e fëmijës dhe se nuk kishte asnjë qëllim për t’i shkaktuar dëm.
Data e gjyqit ende nuk është bërë publike, por çështja pritet të ndiqet me interes të madh në Belgjikë, pasi prek një nga rastet më të ndjeshme që lidhen me kujdesin ndaj fëmijëve dhe përdorimin e medikamenteve.
