Donald Trump mbajti një fjalim para popullit amerikan në prag të mbylljes së këtij viti duke bërë një bilanc për 11 muajt e drejtimit të tij në Shtëpinë e Bardhë. Teksa u fokusua tek lufta kundër emigracionit të paligjshëm dhe ekonomisë, Trump sulmoi edhe paraardhësin e tij, Joe Biden duke thënë se administrata që drejton Trump arriti zero hyrje të paligjshme pa patur nevojë për një legjislacion të ri.
Në të njëjtën kohë, ai argumentoi se vendi tashmë ka filluar të ulë çmimet, pavarësisht pakënaqësisë së vazhdueshme të qytetarëve me koston e jetesës. “Njëmbëdhjetë muaj më parë trashëgova një rrëmujë dhe po e rregulloj. Pas vetëm një viti, kemi arritur më shumë sesa mund ta kishte imagjinuar kushdo”, tha ai, duke përdorur retorikë të ashpër politike kundër paraardhësit të tij.
Duke hapur fjalimin e tij, Donald Trump foli gjatë për emigracionin, duke pretenduar se në shtatë muajt e fundit “asnjë emigrant i paligjshëm” nuk është lejuar të hyjë në Shtetet e Bashkuara. “Për shtatë muaj, asnjë imigrant i paligjshëm nuk ka hyrë në vendin tonë, gjë që të gjithë e thanë se ishte absolutisht e pamundur”, tha ai, duke sulmuar paraardhësin e tij, Joe Biden, për trajtimin e kufirit.
Imigracioni mbetet një çështje qendrore në axhendën politike të Trump, por sipas një sondazhi të Quinnipiac të publikuar këtë javë, 54% e votuesve të regjistruar nuk e miratojnë trajtimin nga Trump të çështjes, krahasuar me 44% që e miratojnë.
Presidenti gjithashtu trajtoi strategjinë e administratës së tij, duke vënë në dukje se, ndryshe nga mandati i tij i parë, theksi është zhvendosur brenda vendit, me një rritje të arrestimeve dhe deportimeve të emigrantëve pa dokumente. Sipas Departamentit të Sigurisë Kombëtare, më shumë se 605,000 deportime kanë ndodhur që nga janari.
Donald Trump u përqendrua më pas te ekonomia, duke pretenduar se brenda pak muajsh vendi kishte kaluar “nga më e keqja në më të mirën”, duke përmendur një ulje të çmimeve për mallrat bazë. “Po i ul këto çmime të larta dhe po i ul shumë shpejt”, tha ai nga Shtëpia e Bardhë, duke ia atribuar rritjen e inflacionit administratës Biden dhe duke iu referuar një “kaosi” ekonomik që, siç tha ai, administrata e tij po përpiqet ta rregullojë.
Në të njëjtën kohë, ai premtoi masa të reja lehtësuese për qytetarët nga viti 2026, duke iu referuar rregulloreve tatimore të miratuara si pjesë e projektligjit republikan, të cilin e përshkroi si “një projektligj të madh dhe të bukur”.
Në një fragment karakteristik nga deklarata e tij, republikani i premtoi personelit ushtarak amerikan se do të merrnin një bonus prej 1,776 dollarësh dhe siguroi se SHBA-të janë “gati për një bum ekonomik që bota nuk e ka parë kurrë më parë”.
Ky veprim është pjesë e një përpjekjeje më të gjerë të Shtëpisë së Bardhë për të adresuar pakënaqësinë e votuesve me ekonominë, e cila ka dëmtuar vlerësimet e miratimit të presidentit dhe ka shqetësuar republikanët përpara zgjedhjeve të mesit të mandatit të vitit të ardhshëm. Versus.al
