Një autobus turistik që po kthehej për në New York City nga Ujëvarat e Niagaras u përfshi në një aksident të rëndë të premten, duke u rrokullisur në një autostradë ndërshtetërore. Në bord ndodheshin 54 persona, pesë prej të cilëve – të gjithë të rritur – humbën jetën në vendngjarje, ndërsa shumë të tjerë mbetën të plagosur.
Sipas policisë, autobusi doli nga rruga, u përmbys dhe disa pasagjerë u nxorën jashtë mjetit gjatë përplasjes. Viktimat dhe të plagosurit ishin të moshave nga 1 deri në 74 vjeç. Shumë mbetën të bllokuar brenda për minuta të tëra, ndërsa ekipet e emergjencës punuan për t’i nxjerrë nga rrënojat.
Shumica e pasagjerëve ishin me origjinë indiane, kineze dhe filipinase, ndaj autoritetet sollën përkthyes në vendin e ngjarjes për të ndihmuar në komunikimin me të mbijetuarit dhe familjarët.
Hetimet paraprake kanë përjashtuar mundësinë e një defekti mekanik apo problemi në sistemin e drejtimit. Sipas Majorit të policisë shtetërore, Andre Ray, duket se shoferi u shpërqendrua për një moment dhe, në përpjekje për të rikthyer kontrollin, bëri një manovër të tepruar që çoi në përmbysjen fatale të autobusit.
Shoferi mbijetoi dhe po bashkëpunon me autoritetet. Deri të premten në mbrëmje, ndaj tij nuk ishte ngritur asnjë akuzë. Ndërkohë, Bordi Kombëtar i Sigurisë së Transportit njoftoi se ka dërguar një ekip në New York për të hetuar shkaqet e plota të aksidentit.
Transporti mjekësor ajror "Mercy Flight" njoftoi se tre nga helikopterët e tij, së bashku me tre të tjerë nga shërbime të tjera, u angazhuan për të transportuar të plagosurit drejt spitaleve lokale. Më shumë se 40 persona u trajtuan për lëndime të ndryshme, që varionin nga trauma në kokë deri te fraktura në gjymtyrë. /Versus.al/
