Zjarrfikësit në Novi Pazar po përballen që nga mesnata e djeshme me një zjarr kolosal, i cili është cilësuar nga autoritetet vendore si “zjarri më i madh në historinë e këtij qyteti”.
Zjarri, i cili shpërtheu rreth orës 02:00 në zonën industriale, përfshiu fabrikën tekstile EMA-TEX, guroren Musiç, si dhe një sërë magazinash dhe objekte magazinimi materiali, duke shkaktuar dëme të mëdha materiale dhe tym të dendur që u pa nga pothuajse çdo pjesë e qytetit.
View this post on Instagram
Zjarrfikësit, të ndihmuar nga ekipet nga qytetet fqinje si Sjenica, Tutin dhe Kraljevo, kanë punuar me intensitet të lartë për ta vendosur zjarrin nën kontroll pas një beteje disa-orëshe. Për shkak të pranisë së materialeve të lehta që digjen shpejt, situata ka qenë e vështirë dhe zjarri ka patur intensitet të lartë.
Në terren janë angazhuar edhe ekipe të shërbimeve të emergjencës dhe Policisë, të cilat janë duke siguruar zonën dhe ndihmuar në menaxhimin e situatës përreth vendngjarjes. Autoritetet i kanë këshilluar banorët të shmangin zonën e zjarrit dhe të qëndrojnë larg tymit të dendur.
Sipas informacioneve paraprake, nuk raportohet për viktima, por dëmet materiale janë të mëdha, dhe vlerësimet e mëtejshme për shkallën e tyre do të bëhen pasi situata të stabilizohet nga shërbimet e emergjencës.
Zjarrfikësit dhe shërbimet emergjente do të qëndrojnë në terren deri në fikjen totale të zjarrit dhe shpalljen e situatës si të sigurtë./Versus
