'Lufta më Rusinë është më afër fundit nga sa mendojnë shumica' u shpreh presidenti ukrainas, Volodymuyr Zelenskyy gjatë një interviste për median amerikane ABC News, duke u bërë thirrje edhe njëherë aleatëve që të ndihmojnë ushtrinë ukrainase me armatime.
'Plani për fitore është të forcojmë Ukrainën. Prandaj, kërkojmë nga miqtë tanë, aleatët tanë që të na forcojnë. Kjo është shumë e rëndësishme ”, tha presidenti ukrainas, duke shtuar: “Unë mendoj se jemi më afër paqes sesa mendojmë. Jemi më afër fundit të luftës.'
Përveç kësaj, Zelensky deklaroi se Putini ka frikë nga operacioni në Kursk, i cili po zhvillohet nga Forcat e Armatosura të Ukrainës.
“Është e vërtetë. Ai ka shumë frikë", vuri në dukje presidenti ukrainas, duke shtuar se "edhe njerëzit e tij e panë paaftësinë e tij për të mbrojtur tokat e tyre" .
Presidenti ukrainas ndodhet në Shtetet e Bashkuara të Amerikës, ku po merr pjesë në aktivitetet e Asamblesë së Përgjithshme të 79-të të OKB-së.
Përveç kësaj, ai planifikon të takohet me Presidentin e SHBA-së Joe Biden , si dhe me kandidatët presidencialë Kamala Harris dhe Donald Trump për t'u prezantuar atyre "planin e fitores" që ai ka hartuar.
Duke iu referuar kësaj, presidenti ukrainas tha se negociatat me Rusinë nuk janë pjesë e planit që ai do të paraqesë.
“Nuk po flasim për negociata me Federatën Ruse. Është një urë për një dalje diplomatike që do të çojë në përfundimin e luftës. Vetëm nëse kemi një pozicion të fortë, do të jemi në gjendje t'i bëjmë presion Putinit që të ndalojë luftën, diplomatikisht ," u shpreh Zelenskyy.
Përgjigja e Kremlinit
Përfaqësuesi për shtyp i presidentit rus, Dmitry Peskov , duke komentuar fjalët e Zelenskit për përfundimin e konflikteve në Ukrainë, tha se çdo luftë përfundon në një mënyrë ose në një tjetër, por Rusia nuk ka disa zgjidhje alternative për të arritur qëllimet e saj.
“Ju e dini se çdo luftë përfundon në paqe në një mënyrë ose në një tjetër. Por për ne, arritja e qëllimeve tona të deklaruara është absolutisht e vetmja alternativë ”, tha Peskov, duke iu përgjigjur një pyetjeje të gazetarëve./ Versus.al
