Rreth 20 vjet më parë, bota e modës u bashkua me kinemanë në një mënyrë që la gjurmë të pashlyeshme. Në vitin 2004 u publikua reklama legjendare “No. 5 The Film” për parfumit ikonik Chanel No. 5, me protagoniste aktoren fituese të Oscarit Nicole Kidman dhe me regji nga vizionari Baz Luhrmann.
Bëhej fjalë për reklamën televizive më të shtrenjtë që është prodhuar ndonjëherë, me një buxhet marramendës prej 33 milionë dollarësh, që sot do të kushtonterreth 52 milionë dollarë.
Reklama zgjat vetëm tre minuta, gjë që do të thotë se çdo sekondë kushtoi 275 deri në 288 mijë dollarë. Por rezultati e arsyetoi çdo qindarkë.
Filmi u realizua në stilin romantik dhe të ndritshëm të Moulin Rouge, një nga veprat më të famshme të Luhrmann, duke u kombinuar natyrshëm me luksin absolut të shtëpisë Chanel.
Në film, Nicole Kidman luan një yll të kinemasë që përpiqet t’i shpëtojë vëmendjes së medieve për të jetuar një dashuri të ndaluar me një të panjohur, rol që u interpretua nga aktori Rodrigo Santoro.
Për këtë projekt, Kidman u pagua me 3 deri në 3.7 milionë dollarë, ndërsa mbante veshur një krijim të mahnitshëm të Haute Couture nga Karl Lagerfeld, i cili drejtoi edhe konceptin artistik të fushatës.
Muzika e reklamës, e bazuar në një vepër të Claude Debussy, shtoi një shtresë të re elegance, duke e shndërruar këtë prodhim në një moment historik për botën e modës dhe të marketingut.
