Një gabim i rëndë në transmetim televiziv ka shkaktuar tronditje në Argjentinë, pasi gjatë një programi u raportua gabimisht vdekja e babait të futbollistit Lionel Messi, Jorge Messi.
Lajmi i pavërtetë u dha në emisionin “El Show del Verano”, duke shkaktuar konfuzion dhe reagime të menjëhershme në studio dhe në publik. Më pas u konfirmua se informacioni ishte i pasaktë.
Emisioni u ndërpre menjëherë pas gabimit, ndërsa më vonë prezantuesja Florencia Peña kërkoi falje publike, duke u shfaqur e përlotur dhe duke deklaruar se lajmi i ishte dhënë nga redaksia gjatë transmetimit.
Televizioni ka reaguar duke kërkuar ndjesë për ngjarjen dhe duke njoftuar masa të ashpra, përfshirë shkarkimin e stafit përgjegjës për përhapjen e informacionit të rremë.
Ngjarja ka shkaktuar reagime të forta në opinionin publik argjentinas, duke nxjerrë në pah edhe një herë rrezikun e lajmeve të pakonfirmuara në transmetimet live.Versus.al
