Rreth njëqind copa enësh porcelani janë vjedhur nga Pallati presidencial francez Elysee. Tre persona, përfshirë financierin kryesor të pallatit presidencial, janë nën hetim. Dëmi i shkaktuar vlerësohet në disa dhjetëra mijëra euro.
Enët e porcelanit, të përdorura për darkat shtetërore, janë vjedhur gradualisht nga Elysee-ja gjatë pak më shumë se dy viteve, raporton gazeta Le Parisien.
Personi kryesor i dyshuar është financieri kryesor i pallatit presidencial, Thomas M., i cili dyshohet se ka patur ndihmën e partnerit të tij, një antikuar. Punonjësi i Elysee-së dyshohet se më pas ka shitur këtë enë porcelani, e prodhuar nga Fabrika Kombëtare e Sèvres, tek një koleksionist porcelani në Versajë. Kontakti i parë me koleksionistin dyshohet se është bërë që në fillim të vitit 2024, ndërsa copat kanë filluar të zhduken gradualisht. Inventari zyrtar dyshohet se është falsifikuar për të fshehur vjedhjet.
Pasi mungesat e enëve u bënë të tepërta, shërbimet e Elysee-së njoftuan xhandarmërinë. Hetimi i seksionit të hetimeve të Parisit u përqendrua shpejt tek tre të dyshuarit, të cilët u arrestuan më 16 dhjetor në Loiret dhe Versajë.
Koleksionisti, i cili ishte gjithashtu roje në Muzeun e Luvrit, po ndiqej për marrjen e mallrave të vjedhura dhe ka pranuar akuzat.
Dëmi i shkaktuar vlerësohet në disa dhjetëra mijëra euro. Pothuajse të gjitha objektet e vjedhura janë rikuperuar gjatë bastisjeve. Personat e përfshirë janë lënë nën kontroll gjyqësor, ndërsa financieri kryesor ka dhënë dorëheqjen. /VERSUS
