Zëvendësdrejtori i Policisë së Kosovës për rajonin e Veriut, Veton Elshani, ka konfirmuar se ka përfunduar intervistimi i gruas së Milan Radojiçiqit.
“Po, intervista me këtë person ka përfunduar dhe më pas është liruar”, ka thënë shkurt Veton Elshani për KoSSev.
Elshani më herët kishte treguar se gruaja e Radojiçiq është intervistuar në prani të avokatit të saj nga Krimet Ekonomike.
“Konfirmojmë se në Mitrovicë Veri është duke u intervistuar ky person në prani të avokatit, me ftesë të Krimeve Ekonomike në Prishtinë”, ka deklaruar Elshani për Express.
Radojiçiq, i cili është i sanksionuar nga Shtetet e Bashkuara të Amerikës, ka marrë përgjegjësinë për sulmin terrorist në Banjskë, ku u vra polici Afrim Bunjaku, në shtator të vitit të kaluar.
Pas sulmit në Banjskë, Policia ka kryer bastisje në pronat e tij në veri, përfshirë edhe një restarant që është në emër të gruas së tij, të cilat janë sekuestruar tashmë.
