Burgosja dhe më pas dënimi me 2 vite burg për blerje votash siç duket nuk e nxorri pa përfitime ish-kryebashkiakun e zgjedhur të Himarës, Fredi Belerin.
Në një intervistë për Euronews gjatë vizitës së tij në Shqipëri si eurodeputet, Beleri tha se as nuk e kishte pasur qëllim dhe as nuk e kishte ëndërruar që një ditë të mbante këtë lloj posti. Sipas tij, ka qenë sulmi politik nga Rama që ndikoi në futjen e tij në listat e kandidatëve të partisë së Mitsotakis në Greqi “Demokracia e Re”.
“Në burg kam qenë 16 muaj, njeriu kur kalon një problem është si të mos e ketë pasur kurrë, isha në burg, dola, tani jam eurodeputet, s’e kisha ëndërruar as e kisha qëllim. Unë me disa himarjotë të tjerë donim të fitonim bashkinë Himarën që të punonim për vendin tonë. Sulmi i paprecedentë i kryeministrit, mënyra se si drejtësia u përdor prej tij, arrita që sot të jem eurodeputet. Kanë merita jo vetëm kryeministri, por edhe gjykatësit, prokurorët të cilët nën urdhrat e tij bënë një çështje që nuk ke nga ta kapësh, që nuk ka asnjë të vërtetë brenda dhe këtë padrejtësi kryeministri dhe populli greke kuptoi që kjo përndjekje ishte e padrejtë dhe më dhanë votën për eurodeputet”, tha Beleri.
Në ditën e parë të vizitës së tij në Tiranë si eurodeputet ku pati takime me parlamentarë shqiptarë lidhur me rezolutën e Parlamentit Europian e cila nuk u miratua, Beleri u godit me vezë nga një qytetar i cili e akuzonte për masakrën e Peshkëpisë. Versus.al
