Komisioni Qendror i Zgjedhjeve, ka shtyrë për nesër seancën ku do të vuloset “fati” i mandatit të Fredi Belerit si kryebashkiak i zgjedhur i Himarës në zgjedhjet vendore të 14 majit, 2023.
Duke qenë se Beleri ndodhet në burgun e Fierit ku vuan dënimin prej dy vitesh për blerjen e votave në Himarë, avokatja e tij ka pretenduar se klienti i saj nuk është njoftuar personalisht për këtë seancë dhe ka kërkuar që të merret leje nga Drejtoria e Burgjeve për të mundësuar praninë e tij në sallë ku do të shfaqë pretendimet e tij.
Seanca do të mbahet në orën 10:00 ndërsa ende nuk dihet nëse Fredi Beleri do të lejohet nga Drejtoria e Burgjeve që të jetë i pranishëm. Në seancën e sotme ishte edhe kreu i PBDNJ, Vangjel Dule.
Ndërkohë prej muajsh, bashkia e Himarës nuk gjen qetësi. Pas arrestimit të Fredi Beleri i cili më pas rezultoi kandidati fitues i zgjedhjeve lokale të 14 majit, Jorgo Goro kandidati socialist vijoi të mbetej në detyrë pavarësisht se humbi zgjedhjet. Por shkarkimi i tij erdhi pas arrestimit me 23 mars nga ana e SPAK për tjetërsim të pronave në Himarë.
Kjo solli zgjedhjen e Blerina Balës në krye të bashkisë, por kjo e fundit dha dorëheqjen nga posti vetëm 2 muaj pas emërimit në detyrë në 29 mars. Sërish Këshilli Bashkiak u mblodh duke zgjedhur këtë herë si kryetar të komanduar Arqile Bollanon. Nesër pritet të vendoset mbi vlefshmërinë e mandatit të Belerit si kryetar i zgjedhur i bashkisë Himarë, në kushtet kur ky i fundit po vuan dënimin me 2 vite burg nën akuzën e korrupsionit në zgjedhjet vendore të 14 majit. Versus.al
