Lulzim Basha, drejtuesi i Koalicionit Euroatlantik dhe ish-kryetar i Partisë Demokratike (PD), ka hequr të gjitha logot e PD-së nga zyra e tij, pas një urdhëri të Komisionit Qendror të Zgjedhjeve (KQZ).
Në vend të tyre, tani është vendosur logoja e Koalicionit Euroatlantik, me të cilën Basha do të konkurrojë në zgjedhjet e 11 majit.
Gjatë një seance më 21 mars, KQZ vendosi që Basha të mos përdorë simbolet e PD-së në ambientet private ku ai operon.
Kjo pasi, Partia Demokratike e kryesuar nga Sali Berisha, bëri një ankimim, ku kërkonte heqjen e logove nga ambientet private të partisë psë Bashës.
Kryetari i KQZ, Ilirjan Celibashi, paralajmëroi se nëse vendimi nuk respektohej, do të ndërhynte edhe policia.
“Dakord me kërkesën e bërë nga subjekti zgjedhor PD për t’u hequr këto simbole nga ambientet private dhe për zbatimin e këtij vendimi do të ngarkohet policia bashkiake dhe ajo e shtetit. Do të caktojmë edhe një afat në lidhje me zbatimin e këtij vendimi”, u shpreh Celibashi në seancën e 21 marsit./Versus.al
