Kryetari i Partisë Demokratike, Sali Berisha, zhvilloi sot një takim me diasporën shqiptare në Romë, ku diskutoi për zgjedhjet e 11 majit dhe rëndësinë e përfshirjes së emigrantëve në procesin zgjedhor. Takimi, i mbajtur në ambientet e një hoteli të njohur në kryeqytetin italian, mblodhi dhjetëra përfaqësues të komunitetit shqiptar në Itali.
Në fjalën e tij, Berisha theksoi nevojën që diaspora të ketë një rol më aktiv në politikën shqiptare dhe kritikoi qeverinë për mungesën e një mekanizmi të qartë që do t’u mundësonte emigrantëve të votojnë nga jashtë. “Ne nuk mund të pranojmë që mijëra shqiptarë, të cilët kontribuojnë për ekonominë e vendit, të mbeten të përjashtuar nga vendimmarrja politike,” deklaroi Berisha.
Megjithatë, një nga momentet që tërhoqi më shumë vëmendje gjatë takimit ishte prania e ish-kryeprokurorit të Përgjithshëm, Adriatik Llalla. I ulur mes pjesëmarrësve, Llalla ndoqi fjalimet pa dhënë ndonjë deklaratë publike.
Adriatik Llalla u dënua në vitin 2021 me dy vite burg për fshehje dhe mosdeklarim pasurie, një vendim që u mor nga Gjykata e Posaçme kundër Korrupsionit dhe Krimit të Organizuar. Megjithatë, ai u largua nga Shqipëria para ekzekutimit të dënimit. Interpol Tirana ka kërkuar ekstradimin e tij për të vuajtur dënimin, ndërkohë që Llalla ka pretenduar se ka aplikuar për azil në Itali.
Pjesëmarrja e Llallës në këtë aktivitet politik ka ngritur pikëpyetje mbi qëndrimin e tij aktual dhe mbi marrëdhëniet e tij me Partinë Demokratike. Deri më tani, as ai dhe as organizatorët e takimit nuk kanë dhënë një sqarim për praninë e tij në këtë event. /Versus.al/
