Partia Demokratike ka denoncuar publikisht dy tendera me vlerë totale 7.5 milionë euro, të zhvilluar nga Drejtoria e Tensionit të Lartë në OSSH sh.a, të cilët sipas opozitës, janë shembull tipik i abuzimit me fondet publike dhe mungesës së konkurrencës reale.
Zëdhënësja për Antikorrupsionin në PD, Genta Vangjeli, deklaroi se tenderat janë zhvilluar në të njëjtën datë, më 1 shtator, me pjesëmarrje të të njëjtëve ofertues dhe me shpalljen fitues të të njëjtit bashkim operatorësh për të dy procedurat.
Tenderat në fjalë janë:
Ndërtimi i linjës 35kV N.St Koplik 220kV – N.St Vukpalaj me dy qarqe, me fond limit prej 3 milionë euro;
Ndërtimi i linjës së re 35kV N.St Vukpalaj – Tamare dhe ndërtimi i një nënstacioni të ri 35/10kV në Tamare, me fond limit prej 4.5 milionë euro.
“Të dy procedurat janë zhvilluar në mënyrë identike, me të njëjtët operatorë, të njëjtin renditje, dhe me oferta që kapin rreth 98% të fondit limit – një tregues i qartë për mungesë konkurrence dhe paracaktim të fituesit,” tha Vangjeli, duke publikuar edhe dokumentet zyrtare të prokurimit.
Sipas saj, këto tendera janë dëshmi e shndërrimit të institucioneve publike në instrumente abuzimi nga administrata e kryeministrit Edi Rama. Ajo akuzoi qeverinë për zhvillimin e tenderave fiktivë dhe favorizimin sistematik të operatorëve të caktuar, në kundërshtim me ligjin për prokurimet publike.
“Pjesëmarrja e njëjtë, me të njëjtën renditje dhe të njëjtin fitues në procedura të ndryshme ngre dyshime serioze për mungesë transparence dhe trajtim të pabarabartë të operatorëve ekonomikë,” tha zëdhënësja e PD.
Partia Demokratike i bën thirrje organeve kompetente, përfshirë SPAK-un dhe Kontrollin e Lartë të Shtetit, të nisin menjëherë hetimet për këto raste, duke i konsideruar ato si abuzim të rëndë me fondet e qytetarëve shqiptarë dhe si shkelje të rëndë të ligjit për prokurimet publike.
